He thu hi Law and Judicial Minister leh Champhai South bialtu MLA Pu TJ Lalnuntluanga'n nizana hnawrbawk tak Sub-Hqtrs YMA Champhai (SYMA) leh Lalluava Cable Network (LCN) Champhai te tangkawp buatsaih, LCN Zokhawpui Inter Branch YMA Hnam lam leh Hla do chham intihsiak a telpui tuma a sawi a ni.
Khuallian Pu TJ Lalnuntluanga chuan hnam ziarang leh tih dan phungte chhawmnunga vawnhim zel anih theihna tura hruaitu leh mi inphalte hmalakna a fak a. Zofate chu India rama hnam hrang hrang awm khawm kara hnam tlem ber pawl kan nih thu sawiin, hnam dang te chu upain changkang zawk mahse mahni hnam ziarang leh tihdan phungte kan zahpui tur a ni lo a, hnam ziarang chawinungin hnam dangte lakah chungnungna rilru kan pu tlat tur a ni, a ti a. Pathianin mahni hnam ang zela kan par chhuah a duh thu sawiin, zozia taka kan lan hi kan mawina leh zahawmna bulpui ber a ni a, mahni hnam kan changkan san tur a ni lo a, kan ngaisangin hnam rilru kan put chhung chuan kan chungchuang bik ani tih kan hriat angai, a ti a. Law Minister chuan hlawhtlinna leh changkanna dawng thei tur chuan khawi hmunah pawh kan kalin kan tlangnel halh tur a ni a, kan duh zawng leh mamawhte zamna tel hauh lovin kan bawhzui thei tur a ni, a ti bawk.
Law Minister chuan ram leh hnam kan dinchhuahna turin hnam zinga kan chungnungna leh vohbik nihna kan vawngnung zel angaih thu leh hnam hmangaihna rilru nghet tak kan put angaih thu a sawi a. Hnam irawm chhuak zai phung mila Pathian kan fak theih hun a nghahhlelhawm thu sawiin, hei hian Mizote nunah sakhuana a tuh ngheh zual sauh sauh ka ring tlat a ni, a ti a. Sawrkar anga hnam ziarang leh tihdan phungte humhim turin tihtheih a neihna zawnah theihtawp chhuah a tum thu sawiin, kalkhawmte Krismas leh kum thar hun hlimawm tak hmang turin duhsakna a hlan nghal a ni.
He intihsiaknaah hian Mizo hnam lam pathum Cheraw (Buhzaaih), Tlanglam, Chheihlam leh Hla do chham hmangtein Champhai khawpui huam thuthmun YMA Branch 15 te'n December Ni 17, 2019 zan atang khan intihsiakna an nei tan a. Hnam lam bikah lam tinah Citation bakah pakhatnain Rs 5000/-, pahnihnain Rs 3000/- leh pathumnain Rs 2000/- an dawng a.
Buhzaaih Cheraw tihthat dan indawt: (1) Kahrawt Branch YMA (2) Vengthlang Branch YMA (3) Kanan Branch YMA. Tlanglam tihthat dan indawt (1) Kanan Branch YMA (2) Vengthlang Branch YMA (3) Kahrawt Branch YMA. Chheihlam tihthat dan indawt: (1) Kahrawt Branch YMA (2) Vengthlang Branch YMA (3) Kanan Branch YMA. A pumpuia branch titha ber Kahrawt Branch YMA-in Citation leh pawisafai Rs 50000/- an dawng a, Vengthlang Branch YMA pahnihna niin Citation leh pawisafai Rs 30000/- an dawng a, Pathumna Kanan Branch YMA in Citation leh pawisafai Rs 10000/- an dawng bawk a ni.
Hla do chham intihsiaka pakhatna Ngurkhuma, Vengthlang Branch YMA-in Rs 1000/- a dawng a, pahnihna Lalchhuanmawia, Vengthlangin Rs 700/- leh pathumna Vanlalhruaizela, Venglai Branch YMA-in Rs 500/- a dawng a. Mipa Chheihlam thiam berah Fabian Lalrosanga, Kahrawt Branch YMA chu thlan niin, hmeichhe lamah R.Vanlalremruati, Vengthlang Branch YMA chu thlan a ni. Khuangpu tha berah Pu C.Liandailova, Hmunhmeltha Branch YMA chu thlan a ni bawk.
He hun hi Pu VL Chama Hnamte, President, Sub-Hqtrs YMA Champhai chuan a kaihruai a. Nl Lalmuanpuii, Secretary, Cultural Sub-Committee, SYMA in report a pe a. Pu C.Vanlalhmuaka, Proprietor LCN leh Pu R.Vanlallawma, Vengthlang te'n thu an sawi a. Pu PC Lalrawnliana, Secretary, SYMA in lawmthu sawina neiin hun a khar a ni.
