Champhai District Rural Development Agency (DRDA) chu India ram pumah Tlangram zinga kumin chhunga  MGNREGA hnathawk tha ber a puan ni a, he lawmman hlu tak hi Champhai DRDA Project Director Pi Ethel Rothangpuii chuan  New Delhi-ah a dawng a ni. Hemi bakah hian Rural Development hnuaia hna peng hrang hrang thawhna-ah Mizoram State chuan tehfung chi hrang 101siamah lawmman pali a dawng tel bawk a ni.

MGNREGS hi Mizoramah kum 2007 khan kalpui tan niin,  Champhai District chhung hmun tinah he Programme in a huamte tha taka thawh a ni a.  Rural Development hnathawh hi Online vek a kalpui anih tawh vangin nitin hnathawh leh sum hman dante hi Delhi tlang atangin enfiah vek a ni tawh a.  New Delhi atanga endik anih danin  kumin 2019 chhung bikah Champhai District Rural Development Agency chu India ram pum Tlangram (Hilly area) bikah MGNREGS huntiam chhunga hnathawk zo hman leh thawk tha ber-ah puan a ni a.

Mizoram State chu Tlangram (Hilly Area) bikah Online Plan leh Estimate siamah India ram pumah pakhatna anih bakah hunbi tiamchhunga hnathawk zo leh thawktha ber lawmman a dawng bawk a.  Aizawl District chhung Darlawn RD Block hnuaia Khawpuar khua chu Tlangram (Hilly area) bikah India ram puma khaw malkhaia MGNREGS hnathawk tha berah puan niin lawmman hlan a ni bawk.

Mizoram State chhung atanga lawmman chi hrang hrang lak dawng tur hian Rural Development Department hotute: Pu Lalhmingthanga, Secretary; Pu CC Lalchhuangkima, Deputy Secretary; Pu Zoremthara Ralte, Under Secretary leh Pi Ethel Rothangpuii, Project Director, DRDA Champhai te chu New Delhi-ah kalin nimin khan hemi puala inkhawmah hian lawmman hi an dawng a ni.