303/2022-2023

Lunglei the 26^th,April’ 2022 : Nimin (26.4.2022)  khan Lunglei Rahsiveng Indoor Stadium a Badminton Court Chhuatphah (Mat) pahnih phah thar chu Agriculture Minister leh Bialtu MLA nibawk Pu C.Lalrinsanga chuan khuh hawnna hun a hmang.

Badminton Court chhuatphah thar khuhhawnna inkhawm hi Pu Lalhmachhuana, President, Rahsiveng chuan kaihhruaiin  Pu C.Lalrinsanga chuan  Rahsivengin Badminton chhuatphah thar an nei chu a lawmpui thu sawiin a puitlinna tura Sport Minister in tha a thawhpui naah pawh lawmthu a sawi a ni. Pu C. Lalrinsanga chuan Rahsiveng khawtlang mipuite țanrualna fakawm a tih thu  sawiin Rahsiveng  chu venghlun leh entawn tlak, mithiam leh ropui tak takte chhuahna veng ani tiin ruihhlo ngaite chhanchhuah kawngah khawtlang anga an hmalakna leh țanrualna chu fakawm a tih thu a sawi bawk  a ni. Zirna ah țan lak mai piah lamah nakin lawka kan ram hmabak ni mai tur naupangte ruihhlo hmansual laka an him theih nana khawtlang huapa țanlak hi tunlai khawvelah a țul takzet a, kan Bible in naupang chu a kalna awm kawngah zirtir ula, a puitlin hnu pawhin a theihnghilh lo ang a tih kha vawng reng chungin thalaite kawng dika hruai kawngah theihtawp chhuah zui zel turin Rahsiveng mipuite chu sawmin, infiamna hmun hma te hian kan thalaite ruihhlo lama an tlan tur nasa takin a veng a, chumi atana hmanrua pakhat atan Badminton court chhuatphah thar chu țangkai taka hmang turin duhsakna a hlan a ni. Pu C.Lalrinsanga chuan Rahsiveng chhunga sorkar hmachhawp țhenkat  tarlangin PMJVK ațangin Rahsiveng Mini Sport Complex dah tura ruahmanna kalpui mek anih thute Hmawngva kawng ragid pavement-a siam anih tur thute a sawilang bawk a ni. 

Pu Vanlalvena Pautu, President, Rahsiveng Badminton Club hnen ațangin Badminton Court chhuatphah  anih dan report ngaihthlak ani a,  Sanitation Sub Commitee, Rahsiveng YMA ten Faina kawnga inzirtirna ni pahfawma Painting & Slogan Competition YMA chhangte puala an buatsaih lawmman chu Pu C. Lalrinsanga chuan a sem nghal bawk a ni. 

Rahsiveng Badminton Club hi Kum 2003 December-a din a ni a, Lunglei District a Badminton Club lian ber niin member 150 an awm mek a ni. Badmintoncourt chhuatphah  thar hi Yonex company siam a ni.