304/2022-2023
Khawzawl, the 27th April, 2022: District Level Committee on African Swine Fever (DLCASF) Khawzawl District chu nimin chawhnu khan DC Conference Hall-ah Pu C.C. Lalchhuangkima, Khawzawl District Bawrhsap kaihhruaiin an thukhawm.

Thutkhawmah hian Dr. C. Lalsawithuama, DVO Khawzawl chuan ASF hrileng dona kawnga hmalakna leh dinhmun report a pe a. Khawzawl District-ah November ni 18, 2021 hnu lamah hun rei tak chhung ASF case hmuh tawh loh a nih hnuah, April ni 12, 2022 ah Khawzawl Vengthar, Zuchhip leh Darngawn vengah te vawk an thih thu a sawi a. Tun dinhmunah sample 5 test turin an thawn thlak mek thu leh result ngaihchan mek a nih thu a sawi bawk.

Meeting chuan ASF a darh zel loh nan Khawzawl District chhungah khawi hmun atanga mahin vawk leh vawksa lakluh phal loh nise, tin, district chhungah pawh khua leh khua inkarah vawk leh vawksa lakluh leh hralh chhuah khap nise tiin an rel a. VC te leh vawk vulh pawlte thawhho puiah sawm nise tih a ni a. Mipuite hriatthiam theih turin ASF hrileng dona kawnga hriattur tul hrang hrangte puanzar kawngah chak zawka hmalak nise tih a ni bawk a. Heng bakah hian vawk thi an awm chuan tha takin feet 6 tala thukah chinai nen phum thin a pawimawh thu te tarlan niin, ASF a darh zel loh nan khauh lehzuala hmalak zui zel an rel a ni.

Meeting-ah hian Khawzawl District bikah chuan April ni 12,2022 atanga April ni 26,2022 thlenga vawk thi zat chu 78 a tlin tawh thu tarlan a ni bawk.