No.1273/2020-2020

Vawiin khan Agriculture Minister Pu C.Lalrinsanga’n Roadside Market leh Online Organic Vegetable Market Chain, Thingdawl Tuikhur Lu, Melriat-ah a hawng.

Agriculture Minister Pu C.Lalrinsanga chuan COVID-19 hripui leng karah mahni in lum atanga duh zawng zawng thlai MizDen-mobile application hmanga lei theih a chhawpchhuah a ni chu lawmawm a ti a, Mizoram loneitute tan rahbi thar a ni, tiin a sawi a. Mission Organic Value Chain Development Programme in North Eastern Region Scheme (MOVCD-NER) hlawhtlinna chu vawiin programme pawimawh tak-ah hian hmuhtheihin a awm a ni, a ti a. Minister chuan Logistic Partner MizDen in chemical tello a thlai thar chhuah te mimal in-ah an deliver thei tur chu Mizoram Agriculture Marketing bul intanna pawimawh tak a ni, a ti bawk a. Loneitute aia kharchhawng ten hlawkna an neih hi thil diklo a ni a, Online Organic Vegetable Market Chain System-ah pawh hian Rate mumal taka kalpui a ni ang, tiin a sawi. Agriculture Minister Pu C.Lalrinsanga chuan Mizoram sawrkar in loneitute dikna hi kenkawh a tum a ni,a ti a. Loneitute thlai tharchhuah man man taka lei pawh mipuiten kan inhuam tur a ni, a ti a ni. Minister Pu C.Lalrinsanga chuan Organic Farming atanga tharchhuah Organic Vegetable Market Chain siam turin tun kumtir atangin hmalakna kalpui a ni a, tun dinhmunah hian chhungkua 876 velin ram hectare 727 a zau-ah organic farming an kalpui mek a ni, he hmalakna hi Aizawl chhehvel khua 21 ah kalpui mek a ni, a ti bawk. Organic Vegetable Market Chain in District khawpui dangah kalpui turin hma a la mek a, organic farmer ten Organic Certificate an nei chho zel a, India Organic Logo leh Jaivik Bharat Logo hmangin state danga organic thlai thar te (produce) hralh chhuak thei turin hmalak mek a ni, a ti bawk a ni. Minister chuan COVID-19 hripui leng karah ram leilung behchhana ‘Mizoram Economy’ haichhuah tum a, tha thlah miahloa tan a ngai a ni, tiin a sawi bawk.

Horticulture Development Board Vice-Chairman leh Aizawl South III Bialtu MLA nibawk Dr. F.Lalnunmawia pawhin thu sawiin Roadside Market chu a khawtual mi te tan eizawnna tha leh Aizawl a chengte tan thlai hrisel tak neih reng theihna kawng pawimawh tak a nih a beisei thu sawiin, bialtu MLA a nihna anga an mamawhte tihsak turin theihtawp a chhuah tur thu a sawi bawk a ni.

Agriculture Development Board Vice-Chairman leh Lawngtlai East Bialtu MLA nibawk Pu H.Biakzauva pawhin thu sawiin COVID-19 hripui leng karah Mizoram loneitute insuihkhawm leh tanrual a pawimawh a ni, a ti a. Hmasawnna tluantling ‘Sustainable Economy’ a awm theihnan, awareness campaign neiin Agriculture Development Board members te group thum a inthenin Mizoram an fanchhuan thu a sawilang bawk a ni.

He hun hi Commissioner & Secretary, Agriculture Department Pu Lalhmingthanga’n a kaihruaia, Mission Organic Mizoram (MOM) State Co-ordinator Pu Lalhmingmuana’n technical report pe in, MOM Director Dr. H.Saithantluanga’n lawmthu sawiin he hun hi a khar a ni.

Aizawl District Spices Producer Organisation in Roadside Market an sak hi a dung feet 32 niin, avang feet 8 a ni a, market sakna atan hian cheng nuai nga hmanral niin, MOVCD-NER Scheme hnuaia FPO te tana ruahman Input Delivery System/Custom Hiring System pawisa leh an member ten cheng zanga an thawhkhawm atanga sak a ni. Chemical hmang lova chin thlai thar chhuahte hi he market-ah hian lei theih a nih rualin, Aizawl khaw chhunga chengte tan Online Marketing-MizDen kaltlangin online hmangin thlai mamawhte order theih a ni tawh dawn a ni. MizDen Application hi playstore-ah download theih a ni.