No.1706/2020-2021

Vawiin khan Agriculture Minister Pu C.Lalrinsanga hovin a pisa, MINECO-ah Agriculture Development Board meeting neih a ni a. Agriculture Development Board Vice Chairman leh member-te bakah Agriculture Secretary Pu Lalhmingthanga leh officer dangte an tel. Meeting-ah hian May thla chhunga Agriculture Development Board zinchhuah programme report ngaihthlak niin hmalak zel dan tur an sawiho.

Agriculture Minister Pu C.Lalrinsanga chuan COVID19 boruak avangin mahni pawimawhna zawn apiangah invenna leh intodelhna kawngah mipui leh Department hrang hrang kan che suau suau a, tute pawh maiin theihtawp an chhuah a ni, a ti. Khauh taka lockdown kalpui a nih lai pawhin Agriculture Department chuan bahlah vak lovin hma an la thei chu lawmawm a ti a, Pathian malsawmna nia a hriat thu leh Agriculture Develpment Board Member leh official lamte thawhhona thatzia meeting bultannaah hian Minister chuan a sawi a ni.

COVID19 boruak avangin a tir lamah loneituten harsatna an tawk a, amaherawhchu sawrkar laipui pawhin an pawimawh zia hriain lockdown khauh tak hnuaiah pawh loneitute tan hna thawh phalsak an nih tak thu Agriculture Minister chuan a sawi a. Intodelh tura hma kan laknaah Agriculture leh a kaihhnawih department-te leh loneitute pawimawhzia a lang a ni, a ti bawk.

Agriculture Development Board Vice Chairman Pu H.Biakzaua pawhin thusawiin COVID19 boruakah mipui an thlaphan laiin loneitute hamthatna ngaihtuaha zinchhuah programme an buatsaih chu a hlawhtling hle nia a hriat thu a sawi a. Sawrkar laipuiin loneitute tana a bik taka a duan loneituten kum khata cheng 6000 dawn theihna Pradhan Mantri Kisan Samman Nidhi (PM-KISAN) chungchang te, loneituten thlatin pension an dawn theihna tur Pradhan Mantri Kisan Mandhan Yojana leh sawrkar hmalakna dangte inhrilhfiahna hun atan an hmang tangkai hle, niin Vice Chairman chuan a sawi.

District hrang hranga buh leh bal thar tam zawk theihna tur atana leilet siam chungchang zirchiang tur te, loneitute dinhmun a taka hmuhpui tur leh an harsatna tawh mek te chinfel dan ngaihtuah turin Agriculture Minister Pu C.Lalrinsanga leh Board Vice Chairman Pu H.Biakzaua te kaihhruaina hnuaiah Agriculture Development Board member-te chu pawl thumah inthenin May thla chhung khan Mizoram dung leh vang an fang a. Group I Leader-ah Pu Lalropuia Pachuau, Agriculture Development Board member; Group II leader-ah Pu H.Biakzaua, Agriculture Development Board Vice Chairman leh Group III leader-ah Pu C.Lalrinsanga, Agriculture Minister te an ni.

Group I hian chhim lam fangin Keitum, Hnahthial, Lunglei, Lawngtlai, Siaha, Chawngte, Diltlang leh Tlabung an tlawh a. Group II hian Saitual, Chhawrtui, Khawzawl, Champhai, Serchhip leh Thenzawl an tlawh a. Group III hian Kolasib, Bilkhawthlir, Bairabi, Zawlnuam, N.Bukpui bakah Serkhan - Bagha road-a khaw hrang hrangte an tlawh a ni. COVID19 dona atana hmalakna a hlawhtlingin thlai thar pawh a pun beisei a ni a, a hralh chhuah dan tur pawh meeting-ah hian rel nghal a ni.