No.1705/2020-2021

Information & Public Relations Minister Pu Lalruatkima’n vawiin chhun khan a pisa-ah lehkhabu “Zalenna sualtute East Pakistan-ah” tih Pu C. Zama ziak chu a tlangzarh.

Lehkhabu tlangzarh paha thu sawiin Pu Lalruatkima chuan lehkhabu tangkai leh rotling tur ziaktu Pu C.Zama thahnemngaihna a fakawm a ni, a ti a. He lehkhabu kaltlang hian thangtharte hnenah hnam pasalthate inpekna leh zahawmna, thu diktak hrilhfiahin awm se a duh thu a sawi a, Mizo mipui nawlpuiin kan hriatloh thil tangkai leh pawimawh tak tak, thudik ni si a taka tawngtu ngeiin lehkhabuah a ziah lan avangin zirmite leh research ti laite tan pawh a tangkai hle dawn ni a a hriat thu a sawi a. Hnam sipai ram leh hnam tanna an nunna hlantu zahna chibai bukin tun dinhmun hi an inhlanna vanga thleng kan ni, tiin an sulhnu hlu tak takte hi Mizo thangthar lo la awm zel turte thinlungah chhem nun zel ni se a duh thu a sawi bawk.

Pu Lalruatkima chuan COVID-19 hripui vangin khawvel a buai a, COVID-19 darh loh nan sawrkarin theihtawp chhuahin hma a la a. Kohhran, NGO leh sawrkar - lungthu pathumte thawhrimna avangin harsatna lian tak kan la tawk lo a, mipuiten sawrkar thu kan awihna rah kan seng mek lai hian hripui hian kan tualzawl a rawn thleng ve ta reng mai a, hripui hian chhiatna hrang hrang a thlen bakah tam (famine) a nghawng chhoh theih avangin chutiang a thlen loh nan sawrkarin theihtawp a chhuah a, mipuiten sawrkar thu awih leh zawm hi kan tih makmawh a ni, a ti a. Mipuite kan chi-ai fo thin a, fimkhur tak si leh thuawih takin, chi-ai silo in thukhat vuain kan pen ho a tul a ni, a ti.

Pu Lalrintluanga Sailo, Dy. Govt. Chief Whip pawhin thu sawiin lehkhabu ziaktu Pu C.Zama chu rambuai tirh phat atanga rammu nghal a nih avangin lehkhabu ah hian a tawn hriatte a nih ang angin thil thlen dan a ziak a, zalenna sual chungchangah pawh ama mimal ngaihdan leh thlir dan ziaka mi rilru hruai tum mai lovin a chhiartuten fim taka an ngaihdan an siam theih nan felfai takin a ziak a, a ngaihnawm dan tur ngaihtuaha phuahchawp a awmlo, a ti a. “Zalenna sualtuten theihtawp chhuahin an bei a, remna kan lo nei ta a, hei hian Mizoramah hmasawnna tam tak a rawn thlen a ni tih kan hmu in kan hria a, remna avanga thil tha kan neih takte a taka ka hmuh hian thil thalo ngaihtuahna, kan rilru natna te kha ka theihnghilh leh thin a, hmalam hun a eng zawngin min thlir tir thin a ni”, a ti.

“Zalenna sualtute East Pakistan-ah” tih lehkhabu hi Pu C.Zama lehkhabu ziah 28-na a ni a, zalenna sual tan tirha hnam sipaite East Pakistan (tuna Bangladesh ni ta) an kal a, an chenchilh chhung chanchin, East Pakistan an chhuahsan leh tak dan thleng tarlan a ni a, phek 205 a chhah niin, Mizoram Publication Board-in uluk taka an en hmasak hnu ah chhuah tura buatsaih a ni ta a ni.