772/2026-2027 

Aizawl, the 30th May, 2026: Nimin May ni 29, 2026 khan Agriculture Minister Pu PC Vanlalruata chuan, National Conference on Agriculture for Kharif Campaign, New Delhi-a neihah thu a sawi.

National Conference for Kharif Campaign hi India rama agriculture kaihhnawih conference pawimawh tak niin, central sorkara Agriculture Minister leh official pawimawh tak tak bakah, state hrang hrang Minister te leh official te an tel a ni.

Agriculture Minister Pu PC Vanlalruata chuan Mizoram tlangram angah chuan a fur a thala zawh theih feh kawng (all-weather farm road) neih a pawimawhzia a sawi a. India hmarchhakah ruah tui a tam avangin, kuthnathawktute’n an huan ram panna tur kalkawng tha an mamawh hle a; kalkawng tha zawk an neih theihnan central sorkar thawhpuiah a sawm. Minister chuan ruahtui khawlna tur tuizem lian zawk leh tha zawk te pawh Mizoramin a mamawh thu a sawi a; Price Support Scheme hnuaia behliang, chhawchhi leh nihawi te lei tan a nih tur thu te sawiin, central sorkar hotute hnenah lawmthu a sawi bawk.

Minister chuan Mizoram-ah district thar 3 a awm tak avangin KVK thar 3 mamawh belh a nih thu te sawiin, KVK thar dinna tur proposal pawh thehluh a ni tawh a, approval a chhuah vat theihnan central sorkar tanpuina a ngen nghal bawk.

Mizoram chu India ram hmun dang, phai lam te ang lo takin tlangram leilung leh boruak dai nuam tak nei a nih avangin, central scheme te pawh kan ram leilung mila tihdanglam theih ni se tiin rawtna a thlen a, farmer te’n hma an lo sawn zel theihnan central sorkar chu theihtawp chhuaha thawhpui a inhuam thu a sawi.

Conference-ah hian fur thlai chin dan tur (kharif season) leh a kaihhnawih hrang hrang te sawi ho a ni a. Fertilizer hman fimkhur a tulzia te, natural farming ngaih pawimawh a tulzia te leh, India ramin ram dang atanga edible oil a lak luh titlem tura, oilseeds lama tan lak a tulzia te an sawi.

Conference-ah hian Agriculture & Farmers’ Welfare Department atangin Pu Lalnunhlua, Addl Secretary; Pu B Ramnunsanga, Addl Director leh Pu Simon Rosangliana, Deputy Director te’n Minister hi an tawiawm a ni.