773/2026-2027

Aizawl, the 30th May, 2026: Nimin  khan Govt Model Comprehensive School, Model veng Aizawl-ah School Education Minister Dr Vanlalthlana'n  New Age Technology Skill Lab a hawng.

Minister chuan Skill Lab hawnna inkhawmah hian thusawiin Bharat Forge te nen thawkhova New Age Technologies zirna Skill Lab an din chu lawmawm a tih thu leh zirlaiten an țangkaipui ngei a beisei thu a sawi a. Skill Lab hawn tak chuan zirlaite zir dan phung a thlak danglam dawn a, Education chu tun hma chuan ziak, chhiar leh vawn a ni mai a, tunah erawhchuan khawvel a inthlak danglam nasa tawh a,  engnge kan siam theih tih leh kan chinfel theih tih hi a ni tawh zawk a ti a.  Robotics sang tak tak te, drone te, 3D printing te Simusoft atanga kan hmuh theih bungrua hrang hrangte hi a tha hlawm hle a,  zirlaiten an thil hriat leh thiam te chu hmuh theiha an chantir theih a beisei thu a sawi a. Bharat Forge ten zirtirtute training pe a, zirlaibu an pe bawk chu a lawmthu a sawi bawk. 

Minister chuan Skill Lab hian hmasawnna thar a rawn thlen dawn a, he technology hi Aizawl khawpui chhunga zirlaite chauh ni lovin Mizoram puma zirlaite tan a ni a ti a. Laboratory enkawltu zirtirtute chu meichher kengtu an ni a ti.  Minister chuan Class VII ațanga class IX zirlaiten robotic khawl an design thei dawn a, hei hian zirna hi a thlak danglam thei dawn a ni a ti bawk.  CSR hmalakna hmang hian hetiang Lab hi  pahnih dang din a ni leh dawn a ni a ti.  Minister chuan Comprehensive AI Education Programme for School tih zirlaibu a tlangzarh nghal bawk.

He huna khual zahawm Dr Leena Deshpande Vice President & Head CSR Bharat Forge pawhin thu a sawi a, Bharat forge chu thilsiamtu industry a nih thu te, khawl chi hrang hrang part lirthei leh thlawhna thlenga siamtu a nih thu te, hmun hrang hranga  hna an thawh dan leh hmachhawp te a sawi a. Bharat Forge te hian thingtlang hmasawnna tur leh skill development atan hma an la mek a, tehfung chi hrang hrang hmangin thingtlang 130 ah hmalakna tur an thlang a, chung zingah chuan Mizoram chhunga khaw pakhat a tel a, an khaw mamawh an survey-na ațangin ruahtui khawlna siam a ni dawn a ni a ti.  Tuna skill Lab hawn thar takah chuan power supply a khaihlak loh nan  solar inverter an bun tur thu a sawi bawk.

Special Guest Pu David Lalthantluanga Secretary Planning & Programme Implementation pawhin  CSR Cell  hnathawh dan hrang hrangte leh an țangkai dan te  a sawi bawk.

Pi Angela Zothanpuii Director School Education kaihhruai he  Technology Skill Lab hawnnaah hian Pi Ramdinliani Secretary School Education chuan lawmthu sawiin Bharat Forge te nen thawk hova hetiang technology zirna skill Lab din a lo ni ta chu lawmawm a tih thu leh roh taka enkawl tura a duh thu sawiin zirlaiten țangkaipui ngei tura a duhsak thu a sawi.

Mizoram sorkar leh Bharat Forge te chuan thawk dunin CSR kaltlangin he Technologies Lab hi an din a, Bharat Forge hnuai atang hian Simusoft Technologies te chuan Skill Lab din hna an thawk a, software hmanga Robot khawl chi hrang hrang hnathawk thei tura design dan zirna a ni. Industry lian tak taka khawl hmanga hna an thawh dan te, mamawh dan a zira khawl siam dan turte he skill lab atang hian an zir dawn a ni. 

Vawiina New Age Technology Skill Lab hawnnaah hian School Education Department a officer te, Mizo Language Development Board Chairman te, Science & Technology officer te, Samagra Shiksha Officer te, Bharat Forge Vice President te, Simusoft Technician leh School zirtirtute leh zirlai te an tel a ni.