715/2026-2027

Aizawl the 26th May, 2026: Vawiin khan Agriculture & Farmers Welfare hnuaia scheme pakhat Pulses Mission hnuaia District hrang hranga loneitu mi 3700 te chin tur Behliang chi quintal 245 chu Agriculture Department Minister Pu PC Vanlalruata chuan Directorate of Agriculture & Farmers Welfare Office tual atangin a vai liam.

Khuallian Agriculture Minister Pu PC Vanlalruata chuan India ram chu be lam chi-ah a intodelh loh thu sawiin, ram dang atanga kan mamawh tam zawk lak luh mek a nih thu a sawi a. Sorkar laipui chuan be lam chi-a kan intodelh theihna turin scheme pawimawh tak Pulses Mission a lo duang chhuak a, he scheme hnuaiah hian Mizorama loneitu ten Behliang hi ram tin 6000 a zauah an ching dawn a ni, a ti a. Minister chuan behliang hi Mizoram sik leh sa mil em em, chin leh enkawl hautak lo tak a nih avangin kan ramah hian tam tak kan thar chhuah theih ngei a beiseiawm a ni, a ti.

Agriculture Minister Pu PC Vanlalruata chuan behliang mu ro chu Price Support scheme hnuaiah Central sorkar agency NAFED chuan minimum support price (MSP) angin kg 1 ah Rs 84.50 -in collection centre-ah an lei sak vek dawn, tih a sawi a. Hetiang taka a hralhna awmsa veka thlai chin chu loneitute tan a phurawmin, tih tak taka ching leh enkawltute chuan sum tam tak an hai lut thei dawn a ni, a ti. Minister chuan Behliang mai bakah chhawhchhi kg khatah Rs 103 leh nihawi kg khatah Rs 83 hisapin loneitute thar chhuah ang ang te chu NAFED hian an lei sak vek dawn tih a sawi bawk a. Heng Agriculture thlai pathum (3) - behliang, chhawhchhi leh nihawi te hi kan tlangram loneituten a tam thei ang ber an lo thar a, an sum lak luh a lo pun theih ngei na turin Agriculture Department chuan theih tawp a chhuah dawn a ni, a ti. Pu PC Vanlalruata chuan agriculture lama hma kan sawn zel theih nan leh tuna price support scheme hmanga behliang, chhawhchhi leh nihawi sorkarin a lei tur pawh hi a hlawhtlin ngei theihna turin loneituten theihtawp lo chhuah turin a ngen bawk a ni.

Behliang chi flag off programme hi Agriculture & Farmers’ Welfare Secretary Pi Ramdinliani’n a kaihruai a. Joint Director (Crops) Pi R.Lalramhluni'n technical report a pe a. Joint Secretary Pi Zothantluangi, Deputy Secretary Pi Lalremruati, bakah Directorate leh District-a Officer leh Staff ten hun an hmang a. Pi Vanramthangi, Director of Agriculture & Farmers’ Welfare Departmernt in lawmthu sawiin hun a khar a ni.