714/2026-2027

Champhai, dated 26th May, 2026:Vawiin khan Pu Lalbiakfela, Addl. DC kaihhruainain DC Conference Hall, Keifangtlangah NCORD Committee an thukhawm.

He hunah hian Champhai leh a chhehvela ruihhlo man kawnga hmasawnna tur kawng hrang hrang an sawi bakah damdawi ruih theih ni si lo, license nei lova lo zuar te dapchhuah dan turte an sawiho a, ramri-a ruihhlo phurkaitu atan naupang kum tling lo leh kum tling tawk vel chiah chiah te hman nasat an nih thu pawh tarlan niin Pu Lalbiakfela, Addl. DC chuan theihtawp chhuaha tangho zel turin Department hrang hrang a chah a ni.

Champhai Police te chuan May thla chhungin ND&PS Act tlawhchhanin thubuai 9 an ziak lut a, mihring 13 an man bawk. May thla chhung hian Heroin gram 445, Methamphetamine Kg 21.967 leh Alpra Zolam gram 30 an man a, ruihhlo phurhna atana hman four wheeler 3 leh two wheeler taxi 1 man a ni bawk. Champhai Police te hian SP hmalaknain Special Task Force an din mek thu tarlan a ni.

May thla chhung vek hian Excise & Narcotics Department chuan ND&PS Act. tlawhchhanin thubuai 26 an ziaklut a, mihring 24 an man bawk. Heroin Kg 1.767, Methamphetamine Kg 1.166, Alprazolam gram 3.410 te an man bawk.

Food & Drug Administration te chuan Damdawi Drug License neitu ni lo ten Myanmar-a thawnchhuah tur vai ram ami an chah thin thu tarlan a ni a, man tura theihtawp chhuah a nih dan te ngaihthlak a ni tel bawk. Heng bakah hian Drug License nei lova damdawi office leh inah te zuarkual thin te warning pek an nih tawh thu te tarlan niin Damdawi hi license nei pawhin mi in leh office ah te zawrh hi phal a ni loh thu leh location pakhat atang chauh a Damdawi hi zawrhchhuah phal a nih thu te tarlan a ni bawk.

Assam Rifles te hian operation vawi 11 an nei a, ruihhlo ₹7,51,78,250 (nuaih 751 sing 7 sang 8 250) hu an man tawh a, Cigarette vawi 1 an man a, ₹72 lakh (nuai 72) hu a ni. SYMA chuan khawlaia damdawi vawrh thin mi 11 te manin Home ah an dah ve tawh bawk.