975/2024-2025

Aizawl, the 27^th June, 2024 : Vawiin khan Agriculture Minister Pu PC. Vanlalruata’n Mizoram Agriculture Service Association (MASA) in General Conference vawi 9-na an Tourist Lodge, Chaltlang a an hman chu khuallian niin a hmanpui.

Minister chuan sawrkar thar chuan kuthnathawktute intodelhna lam a ngai pawimawh hle thusawiin MASA member zawng zawng te chu an thiamna leh theihna te kuthnathawktu te din chhuah nana ṭhahnemngai taka hmang turin a fuih a ni. Hemi ti hlawhtling tur hian Central leh State aṭanga sum kan dawn ang ang te ṭangkai tak leh daihzai taka hman a ṭul thu a sawi bawk. Pu PC Vanlalruata hian Agriculture Department chu sawrkar in kalpui a tum mek thlai thar leh buh lei a tum chungchanga a kengtu tur Department kan nih avangin a thawktute pawh kan ṭan hle a ṭul thu a sawi a. Buh thar lamah kan intodelh theih nan kan leilet hmun neihsa te pawh thawm ṭhat ngai te thawm a, khawl te nen theihtawpa hma lak a nih tur thu a sawi bawk a ni. MASA member te chu kuthnathawktu te tana hnathawk an nih avangin kuthnathawktute dinhmun chawikan hi an kuta awm a ni tih pawm ṭheuh turin a chah a, kuthnathawktu ten hamthatna nasa zawk thlen thei turin thawhhona leh inpumkhatna ṭha nei turin a fuih bawk a ni.

Khualzahawm nia hun hmanpuitu Dr. H Lianzela, IAS, Secretary, Agriculture Department chuan Agriculture chu chhungtin chawthleng thleng phak a nih avangin Department-in a hmalaknaah te theihtawp chhuah turin MASA member te a chah a ni. Department-in kawng hrang hranga hlawhtlinna duhawm tak tak a nei chho chu lawmawm a ti hle a, hmalam hunah hlawhtlinna thar chang zel thei turin MASA member te chu duhsakna a hlan bawk.

Pu Vanlalthlamuana, MAS, Director of Agriculture pawhin thu sawiin MASA member te chu thawktu indaihlohna nasa tak awm mahse kan hnathawhna kawng hrang hrangah a thara ṭan la leh zual turin a chah a, sawrkar policy hrang hrangte ti hlawhtling tura mahni thawhna hmun ṭheuh ah theih tawp chhuah turin a sawm a ni.

Pu Ngurrinsanga Sailo, Deputy Director chuan lawmthu sawina hun neiin chawhma programme hi tihtawp a ni.

Chawhnu lamah General Conference rorel leh MASA Office Bearer 2024-26 tur thlanna neih a ni a, Office Bearer thlan hi Mizoram Horticulture Service Association (MHSA) ten an neih pui a ni.

Mizoram Sorkarin ‘The Mizoram Agriculture Service Rules, 2009’ siam in Mizoram Agriculture Service hi kum 2010-a din a nih aṭangin MASA General Conference hi kum 2 danah neih thin a ni.