976/2024-2025

Aizawl dated 27th June, 2024: Vawiin khan SCERT tualzawl, Chaltlangah Education Minister Dr. Vanlalthlana chuan ‘42nd State Level Science, Mathematics & Environment Exhibition and Edutech Festival 2024’ a hawng a. ‘Science & Technology for Society’ tih thupui a hman niin Sub-Theme ah ‘Health, Lifestyle for Environment, Agriculture, Communication and Transport leh Computational Thinking’ tih hman a ni.

Education Minister Dr. Vanlalthlana chuan SCERT bultum a School, Department hrang hrang leh he Festival tuipuitu pawl te nen  ‘42nd State Level Science, Mathematics & Environment Exhibition and Edutech Festival 2024’ changtlung tak buatsaih a ni chu lawmawm a tih thu sawiin Exhibition thupui ‘Science & Technology for Society’ tih chu a tak a hman tangkai a hun hle thu a sawi. Education Minister chuan khawvel changkanna ina a ken tel thiamna hmang thiam leh hmang tangkai hmasatu nih a pawimawh zia sawiin chutiang a hmang tangkaitu nih hmasak tum chuan intlansiakna leh inelna nasa tak a awm thin thu a sawi a. Ram dangte rual a hmasawnna kawng kan zawh ve theih nan Mizo thalaite pawhin heng thiamnate hi kan chhawr thiam ve zel a tul thu a sawi.

Khawvel sumdawnna lian ber berte thlan chhuah zinga a tam zawk chu Technology behchhan sumdawnnate an nih thu Education Minister chuan tarlangin Technology thar hman tangkai nachang hre lo company lian tak takte chu an tluk chhiat phah thin thu a sawi a. Khawvel ina a buaipui mek ‘Artificial Intelligence’ pawh kan luhchilh a, kan zirchian a, hman tangkai kan tum ve a pawimawh thu a sawi. Dr. Vanlalthlana chuan hmasawnna hna kalpui dawn chuan hmasawnna awmze nei, inkhairual leh nakin hun lo la awm tur ngaihtuah chung a ruahmanna siam a pawimawh thu sawiin chutiang ngaihtuahna leh finna chherchhuahna hun a hmang turin ‘42nd State Level Science, Mathematics & Environment Exhibition and Edutech Festival 2024’ buatsaihtute leh chhimtute chu duhsakna a hlan a ni.

‘42nd State Level Science, Mathematics & Environment Exhibition and Edutech Festival 2024’ hawnna hun hi Dr. Lalduhawmi Thomte, Joint Director-in a kaihruai a. Pu F. Lalliansanga, Deputy Director (SPW), SCERT chuan State Level Science, Mathematics & Environment Exhibition nei tur a inbuatsaihna kalpui a nih dan sawi zauna hun hmangin Pi Lalnunsiami, Deputy Director (ICT), SCERT chuan EduTech 2024 chungchang sawi fiahna hun a nei a. Pu PC Vanlalruata, Tutor, SCERT chuan lawmthu sawina hun a hmang bawk a ni.

42nd State Level Science, Mathematics & Environment Exhibition atan hian District 5 atangin school 13 an tel a, Model/Exhibit 43 an phochhuak a ni. Heng Exhibit 43 te hi uluk tak a endik an nih hnu ah National Level Exhibition-a tel tur thlan chhuah a ni ang. EduTech Festival 2024 atan hian Stall 10 phochhuah a ni a, chungte chu Mizoram Scholarship Board, Mizoram State e-Governance Society, Buannel Studio Pvt. Ltd, Netsurf Internet Service, Reliance Jio Infocomm Ltd., NIELIT, Aizawl, Aricky Camera & Accessories, Click Studio, NeVA leh ICT, SCERT-te an ni.