LADC VC Inthlanpui 2024 leh Lawngtlai Chandmary bial MDC by-election te tluang takin buatsaih a ni
977/2024-2025
2024 Nikir thla ni 27: Lai Autonomous District Council (LADC) hnuaia Village Council (VC) Inthlanpui 2024 leh 12-Lawngtlai Chandmary bial Member of District Council (MDC) seat ruak hnawh khah nana by-election te chu vawiin, June ni 27, 2024 (Ningani) hian tluang takin buatsaih a ni.
LADC-a VC 99 awm zingah 46-Hmawngbuchhuah VC-ah chuan inthlan chuh tura endikna (scrutiny) pal tlang zo an awm loh avangin inthlan buatsaih a ni lo va; 29-Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai lo (uncontested)-a tlinga puan an ni bawk a. Heti hian LADC hnuaia VC 97-ah inthlanpui vote thlak niin, polling station awm sa 97 bakah, voter tam zualnaa auxiliary polling station dah belh 15 nen, a zavaiin polling station 112-ah vote thlak hi kalpui a ni.
Mizoram MLA Inthlanpui, 2023-ah Lawngtlai East bial aṭanga thlan tlin a nih avangin, bialtu MDC ni lai Dr Lorrain Lalpekliana Chinzah chuan Lawngtlai Chandmary bial MDC seat hi chhuahsanin, he seat ruak hnawh khah nan hian by-election hi buatsaih a ni a. Lawngtlai Chandmary MDC bial chhunga polling station pali - Lawngtlai Chandmary North-I, Lawngtlai Chandmary North-II, Lawngtlai Chandmary South-I leh Lawngtlai Chandmary South-II-ahte by-election vote thlak hi kalpui a ni.
VC Inthlanpuiah hian ballot paper hmangin zing dar 7-ah vote thlak ṭan niin, tlai dar 5 thleng vote thlak hun hawn a ni a. MDC by-election-ah chuan Electronic Voting Machine (EVM) hman ni thungin, zing dar 7 aṭanga tlai dar 5 thlengin vote thlak hun hawn a ni ve bawk.
LADC-a village council 98-ah hian a duh apiangin an chuh theih general seat 492 leh hmeichhe tana hauh reserved seat 98, a zavaiin seat 590 a awm a. Inthlan chuhtu candidate zawng zawng hi mi 1,511 (general seat-ah 1,259 leh reserved seat-ah 252) niin, Bharatiya Janata Party (BJP) candidate 24; Indian National Congress (INC) candidate 300; Mizo National Front (MNF) candidate 438; Zoram People's Movement (ZPM) candidate 549 leh Independent candidate 200 an awm a ni.
Saikhawthlir VC-a seat 5 (general 4 leh reserved 1)-a chuhtu 5 te uncontested-a tlinga puan an nih bakah, vawiina vote thlakna VC 97 zingah 37-Karlui-I, 38-Karlui-II leh 51-Sabualtlang VC-ahte chuan reserved seat-ah chuhtu pakhat ṭheuh (ZPM candidate 2 leh MNF candidate 1) awmin, khingtu awm lo (uncontested)-a tlinga puan an ni bawk a. Inthlan vote thlak hi VC 97-a seat 582 (general 488 leh reserved 94) atan kalpui a ni a. Vote nei mi 55,342 (mipa 27,225 leh hmeichhia 28,117) an awm.
Lawngtlai Chandmary bial MDC by-election-ah hian vote nei mi 2,798 (mipa 1,313 leh hmeichhia 1,485) awmin, inthlan chuhtu candidate mi pathum (Pu F. Hrangtukhuma, ZPM; Pu K. Lalawmpuia, BJP leh Pu C. Lalsawmzuala, MNF) an awm a ni.
LADC VC Inthlanpuiah hian chawhnu dar 1 thlengin (VC 95-ah) vote 23,149 (mipa 10,487 leh hmeichhia 12,662) tlain, vote awm zawng zawng aṭangin 42.40% tla ang a ni a. MDC by-election-ah hian chawhnu dar 1 thlengin vote 1,482 (mipa 691 leh hmeichhia 791) tla thungin, vote awm zawng zawng aṭangin 52.97% vote a tla tawh a ni.
VC Inthlanpuia vote tlate hi vote thlak zawh fel hnu zan lamah polling station hmun ṭheuhvah chhiar nghal a ni dawn a. MDC by-election-a vote tlate erawh chu July ni 1, 2024 (Thawhṭanni) chawhma dar 10-ah chhiar a ni thung ang.
