978/2024-2025

Aizawl 27th June, 2024 : Pu Lalnghinglova Hmar, Labour Employment, Skill Development & Entrepreneurship Department Minister chuan vawiin khan Industrial Training Institute Diamond Jubilee chu khuallian niin a hmanpui.

Khuallian chuan ITI Aizawl Diamond Jubilee lawm theia an awm chu a lawmpui thu sawiin Sorkar kumah kum 60 chu pension a, hahchawlhna hun atana hman tawh tur a nih laiin ITI erawh Diamond Jubilee an thleng chu hmasawn zelna atana chona ni zawk tura a duh thu a sawi a. Kum 60 chhungin kan ram tan chhungkaw engzat nge eizawnna kan siamsak tih leh engtin nge ram hmasawnna atana kan thawh ve tih ngaihtuah rana hmasawn zel turin a chah.

ITI chu hna zirna hmun a nih angin zirlaite leh zirtirtute chu an zirchhuah a, certificate an neih veleha chhawrtlak an nih nghal ngei theih nan tumruhna leh taimakna nen an mawhphurna hlen turin a fuih a. An Training chhuah hnuah pawh inzir chu duhtawk mai lova, mahni-a inzir chhunzawm zel a, kawng hrang hrang YouTube atangte pawha inzir belh zel tur leh khawvel thangzelah hnuchhawna kan awm loh nan an themthiamna chu tunlai khawvel mila tuaihriam a, upgrade ve zel turin a fuih a. Zirlaite chu an hnathawhna hmunah an hmalam hun zel atan hmelhriat leh thiantha siam zel turin a chah bawk a ni.

Jubilee Khualzahawm ni-a hmanpuitu Pu Lalchhuanthanga, MLA, Aizawl South - II, Pu Lalmalsawma Pachuau, Secretary, LESDE bakah Pi Angela Zothanpuii, Director, LESDE pawhin thu an sawi bawk. 

Vawiin hun hi hun hnihah then niin hun khatna-ah hian Jubilee lungphun hawnna khuallian hian neiin Jubilee dar vuak a ni bawk a. Hun hnihna hi ITI Auditorium-ah hmanho niin hunserh, inhmelhriattirna leh sunna, thusawi hrang hrang ngaihthlak a nih bakah Essay Writing Competition leh Hla inphuahsiak-a lawmman semna leh On the Job Training Certificate (Hyundai Motor India Ltd & Surveyor) leh Atal Incubation Centre, SELCO Foundation Certificate hlanna hun hman a ni bawk.

Pu Vanlalhruaia, Principal, Govt. ITI report tarlan danin ITI hi Kum 1964-ah din tan niin tunah hian thawktu Principal 1, Vice Principal 1, Supervisor (i.c) 1, Instructional Staff 28, Non-Teching Staff 13 awmin Engineering Trade 14, Non-Engineering Trade 5, avaiin Trade 19-ah Total Units (thiamna chi hrang hrang zir theih) 23 a awm mek a. Training lai mipa 334 leh hmeichhia 86, an vaiin mi 420 an awm mek a ni. ITI Industry Partner hi Hyundai, Tata a ni bawk. Din a nih tirh Kum 1964-2024 inkara Govt. ITI a in-enroll zawng zawng zat hi 5825 niin 4767 (82%) te'n tha takin an zir chhuak a ni. ITI a zirna hi Craftman Training Scheme (CTS) tih a ni a. CTS-in a tum ber chu :

1. India ramin a mamawh ang zela hnathawktu kutthemthiamnate chherchhuah

2. Industry-a hnathawktute'n an thilsiamte hlawk zawk leh tha zawk an siam theihna tura a tul ang zela zirtir

3. Thalai rualte eizawnna tling khawp kutthemthiamna nei thei tura zirtir. 

ITI hnuaia zirchhuakte hi National Council for Vocational Training (NCVT)-in National Trade Certificate a pe thin a. Hei hi Cetral/State/UT - te recognized certificate a ni. ITI Aizawl bik hian tunah hian 6.4 Grade a neih mek thu a tarlang bawk. 

Pu Kennedy R. Malsawma, Vice Principal, Govt. ITI chuan kalkhawmte hnena lawmthu sawina neiin Jubilee ruai kilho nghal a ni bawk.