979/2024-2025

Aizawl, 27.06.2024: EF&CC Minister Pu Lalthansanga, Aizawl East I bialtu MLA ni bawk chuan a bial chhunga kumin HSSLC exam a topper pathumte chawimawina hun a pisa ah vawiin chawhnu khan a buatsaih a. Lawmpuina thilpek (laptop) a pe a ni.

Minister chuan zirlai hlawhtlinna changte chu a lawmpui thu sawiin, tun an hlawhtlinna chan erawh a bul tanna chauh niin, a aia sang zawk leh dinhmun tha zawk an chan zel a duhsak thu leh, chumi tur chuan nun invawn that a, dawhtheihna leh taimakna neih a pawimawh thu a sawi. Minister chuan thalaite chu an hlawhtlinna atana pawimawh em em an nu leh pa te chu hre reng turin a chah bawk a. Aia upa te ngaihven a, mahni nu leh pa, pi leh pu te hmangaih tlat turin a chah a ni. Pu Lalthansanga chuan tunlai khawvel ah kan ngaihhlut zawng (value system) hi inthlak chho in, sum leh sum in a leih theih thil ngaihhlutna lian tak (materialism) in khawtlang nun a run mek thu sawiin, chutiang ang mi tan chuan kut tlinglo a sum lakluh hrehloh te a awlsam thin thu a sawi a. Chuvang chuan thalaite chu ram nghahfak an nih angin mi rinawm leh mi dik nih tum tlat turin a chah a ni.

Vawiin programme ah hian Champhai South MLA Lt Col. Clement Lalhmingthanga pawh telin, zirlaite fuihna thu a sawi bawk a. Hlawhtlinna nasa zawk chang tur chuan an zir pui, an intlansiak pui mi tam tak aia nasa zawk leh ngawrh zawka an beih a tul zia te sawiin, an nih ang ni theilo a siamtu tur awm ang reng reng thil thalo laka fihlim zel thiam turin a chah a ni.

Vawiina chawimawina hlan te hi HSSLC Commerce a palina Andrew Lalrinawma, Falkland East (St. Joseph Hr. Sec. School) te, Commerce tho a 10-na Lalruatpuia, Sihphir (St. Joseph Hr. Sec. School) leh HSSLC Science a pathumna Muhammad Aatif Nazir, Zemabawk (St. Pauls Hr. Secondary School) te an ni.