3306/2024-2025

Dated Serchhip, 30th November, 2024: Vawiin khan Agriculture, Irrigation & Water Resources leh Cooperation Department Minister Pu PC. Vanlalruata’n Thenzawl Dragon Fruit Growers & Marketing Society General Assembly Vawi 4-na a hmanpui.

Minister chuan thu sawiin Zau ang zawnga hmalak chu sawrkar auhla a nih angin kalpui an tum tih a sawi a, sawrkar tan a model ni thei tura Lamlian Dung Zau a Thenzawl Dragon Fruit Growers & Marketing Society te hmalakna chu fakawm a tih thu a sawi. Local Soda Pvt.Ltd te nena thawhona thuthlung an ziak pawh Minister chuan lawmawm a tih thu sawiin, kuthnathawktuten thei leh thlai an tharchhuahte chu thei tui emaw wine a siamchhuah a nih theih nan dan siamthat tum mek a ni tiin Food Processing lama hmalak an tum dan a sawi a. Kuthnathawktuten man man zawka an tharchhuahte an hralh theihna tura hmalak chu sawrkarin a tum ber niin, ZPM sawrkar chuan kuthnathawktute a dah pawimawh ber a, kuthnathawktute lamah sawrkar a tang tlat dawn tih a sawi a, thawhhona tha tak an neih a pawimawh thu a sawi bawk.

Thenzawl Dragon Fruit Growers & Marketing Society ten kum tina an hman thin General Assembly hi Lamlian Dung Zau ah hman niin Thenzawl Dragon Fruit Growers & Marketing Society Chairman Tv C. Lalrinthanga chuan a kaihruai a, Lamlian Dung zau kawng laih tur chungchang leh tuikhuah tur chungchang report ngaihthlak a ni bawk.

Minister Pu PC. Vanlalruata hi Pu Lalmuanpuia Punte Adviser to CM, Aizawl South III Bialtu MLA Pi Baryl Vanneihsangi leh South Tuipui Bialtu MLA Pu Jeje Lalpekhlua ten an tawiawm a ni.

Thenzawl Dragon Fruit Growers & Marketing Society hi kum 2021 atanga din tan niin tun dinhmunah member 40 an awm mek a, Local Soda Pvt.Ltd te nen Market MOU kum 3 atan an ziak a ni.