3305/2024-2025

Champhai, 30th November 2024: Vawiin khan Adviser to Chief Minister (Technical), Champhai North bialtu MLA ni bawk Er. H. Ginzalala chuan  Indo- Myanmar Border Road  Package 1 & 2 (Teikhang- Mimbung- Sinzawl) leh NH 102B (Ngopa - Saitual) te a enfiah a. Adviser to CM hi NHIDCL hotu ten an ṭawiawm a ni.

Er. H. Ginzalala leh NHIDCL hotute hian Indo Myanmar Road (Tuivai Road) Mimbung - Parva II chu National Highway Status a hmuh theih nan a hmalak dan tur an sawiho a. A ṭul angin Central sawrkar hotute hnenah State sawrkar leh NHIDCL ten an bawhzui dawn a ni.

Champhai North bialtu leh NHIDCL hotute hian Khankawn (Tuivai) - Keifang NH 102B hnathawh mek chu a hmunah an enfiah a, hmasawnna ṭha tak a awm avangin Er. H. Ginzalala chuan lawmawm a tih thu a sawi a ni.

Er. H. Ginzalala hian NHIDCL hotute chu NH 102B Package III Hliappui - Keifang kawng chu tun ṭhal chhung ngei a zo tur leh furpui lai pawha harsatna a awm loh nan a hnathawk turin a ngen a. NHIDCL hotute hian June 2025 hma ngeia zawh an tum thu an lo hrilh a, Mizoram leh Manipur inpawhna kawngpui ṭangkai a nih thuai theih nan chak takin hma an la mek tih an sawi.

Adviser to CM (Technical) hian NHIDCL hotute chu NH 102B kawngpui ngil taka a kal theih nan ruahmanna uluk taka siam turin a ngen bawk a ni.