2366/2025-2026

Aizawl dated 24th November 2025: Zanin khan Mizoram tlawh a cham mek Shri Ram Nath Thakur, Union Minister of State, Agriculture & Farmers’ Welfare chu Pu PC Vanlalruata, Minister chuan State Guest House, Aizawlah inkawmna hun a hmanpui a.  He hunah hian Pu Lalthansanga, Minister, Land Resources, Soil & Water Conservation Department changtu bakah Agriculture & Farmers’ Welfare Department-a thawktute, Land Resources, Soil & Water Conservation, Irrigation & Water Resources, Horticulture leh KVK hotute an tel a. Union Minister of State leh amah rawn zuitute nen chawhlui an kil ho a ni.

He inkawm hona hunah hian Union Minister Shri Ram Nath Thakur chuan Mizorama hmun thenkhat a tlawhnaa kuthnathawktute tih hmasawnna tura a thil ngaih pawimawhte tarlangin Agriculture & Farmers' Welfare Department hnuaia Sawrkar laipui scheme hrang hrang chak zawka kalpui a pawimawh thu a sawi.

Union Minister of State Shri Ram Nath Thakur chuan  vawiina Siaha District-a kuthnathawktute a tlawhna ah mi taima leh thawkrim tak takte a hmuh rualin hmasawnna nasa zawk an chan theihna turin an harsatnate sukiang turin Sawrkarin mawhphurhna pawimawh tak a nei, tih a sawi a. Sawrkar laipui kaltlanga Agriculture department hnuaia kuthnathawktute tana tanpuina awm ang angte chu a dawngtu turten a hun taka an dawn theih nan thawktute chu tan la lehzual turin a chah a. Mizoram chu leilung hausakna ngah tak state a nih avangin hmasawnna chak zawk a awm theih nan heng leilung hausakna te hi hman thiam a pawimawh thu a sawi bawk a ni.

Mizoram State Agriculture Minister Pu PC Vanlalruata chuan kuthnathawktute dinhmun chawikan nana Sawrkai laipui atanga ruahmanna tha tak tak siam a ni thin chu lawmawm a tih thu a sawi a. Union Minister of State hnenah hian Tung leh Cocoa cultivation kalpuina turin Sawrkar laipuiah ruahmanna thehluh a nih tawh thu leh he ruahmanna hi kalpui vat a nih theih nan theihtawp chhuahpui turin a sawm bawk a ni.

Union Minister of State Shri Ram Nath Thakur kawmna hunah hian Pu R.Lalnunzira, Director, Agriculture & Farmers’ Welfare Department chuan kalkhawmte lawmna thu a sawi a. Pachhunga University College zirlaiten hnam lam entirin Pi Zothantluangi, Joint Secretary chuan lawmthu sawina hun a hmang bawk a ni.