2367/2025-2026

Aizawl, 25th November 2025 : Tukin dar 7:30 khan Zoram Drivers' Union (ZDU) buatsaihin 44th Road Safety Week - Fimkhurna Hapta (25th November, 2025 – 1st December, 2025) chu ZDU General Headquarters Office, Chaltlang Lily Veng, Sairang Road-ah hawnna hun hman a ni a. Transport Minister Pu Vanlalhlana chuan khuallian niin 44th Road Safety Week hi a hawng.

Khuallian Pu Vanlalhlana chuan Fimkhurna Hapta hawnnaah hian thu sawiin, November ni 25 atanga December ni 1 thlenga Road Safety Week hman tur chu mipuite hnena fimkhurna thuchah leh mawhphurhna inhriattirna hun pawimawh tak a nih thu a sawi. Road Safety chuan Lirthei khalhtute chauh huam lovin, kawngpui hmangtu zawng zawngte a huam thu leh fimkhurna kawngah pawh mitinin mawh an phurh thu a sawi bawk.

Minister Pu Vanlalhlana chuan lirthei khalh laia rilru pek tawk lohte, hmanhmawh luat avang vanduaina tawk leh nunna chante an awm thin chu pawi a tih thu a sawi a. Sawrkar chuan vantlang himna tura Dan a siamte chu mitinin ngai pawimawh zel turin he hunah hian a chah nghal bawk.

Tukin a 44th Road Safety Week Aizawla hawnna hun hi Pu F. Dosanga, President, Zoram Drivers' Union (ZDU)  chuan a kaihruai a. Mizoram hmun hrangah a rualin Road Safety Week hawnna hun hi hman a ni.  Zoram Drivers’ Union hmalakna hian Lirthei khalh chungchanga Fimkhurna Hapta hi kum 1981 atanga khan Drivers’ Week tih hming puin hman tan a ni a. Kum 2007 atangin Road Safety Week tih a thlakin kumtin hman thin a ni.