Vawiin hian Agriculture Minister Pu. R. Lalzirliana hovin Varhva zaua leilet buh chu Chekawn khawtlang leh Agriculture Department hotuten an seng a, Pu T. Sangkunga, MLA; Chairman, Mizoram Youth Commission ni bawk chuan a tel pui.

Buh seng neihna inkhawm tawi leilet kama neihah thusawiin Minister chuan, kan ram tana thawkchhuaktu, kuthnathawktute bula awm chu nuam a tih thu a sawi a. Kan ramah hnathawk peihlo thalai tam tak an awm laia kawla ni chhuak chhiara thlan tlaa hnathawktute hi kan ramin a mamawhte chu an ni, a ti. Heng kan rama kuthnathawktute hian an lo thawkchhuak tam tawklo anih pawhin thawk lova eiral ringawt tute ai chuan ram tan an hlu em em ani, a ti bawk. Chekawn khawtlangin leilet kianga Waiting Shed sakna an dil chu a pek tur thusawiin, an leilet kawng siamna pawh NEDP atanga ngaihtuah theih a inbeisei thu a sawi a. Chutihlaiin, kuthnathawktuten engkima sawrkar beisei ngawt lova a theih chen chen lo bei ve thin tura ngenin, chuti a nih loh chuan sumin a daih seng bik lova. Vui vaina a thleng thei ani, a ti. Loneitu kal khawmte hmaah Pu R. Zirliana chuan, NEDP chu ?ang tanpuina anih dawn avangin theih tawpa lo bei a, hmasawnna tur nei te hnenah NEDP hi a kal dawn a. Chuvang chuan lo ?angin theihtawp lo chhuah thin rawh u, tiina chah bawk.

He inkhawm tawi hi Pu C. Lalzarliana, Director, Agriculture Department, Crop Husbandry in a kaihhruaia. Pu C. Lalzaliana chuan, kan loneitute an thawkrim hnathawh dan hlawk zawk an thiam deuh deuh a, chutihlaiin sawrkar atangin khawl leh mamawh dang kan inpe ve zel bawk a. Hma kan sawn chho zel ani, a ti bawk.

Vawiina buh sengna hmun Varhva zau a loneitute dinhmun Pu Lalringliana chuan, Varhva zau chu Hactare 60 a zau a nih thu leh a chhehvel khaw pathum, Mualcheng, Khawlailung leh Chekawn atangin chhungkaw 103 ten leilet an nei ani.

Inkhawm tawi neih hnu hian Minister ho hian buh an at hova, chumi hnuah Minister hian Tuipuia NEDP atanga Purun chinna hmun tlawh turin Tuipui lui a pan lehnghal a ni.

Vawiina Minister in Varhva zau buh a sengpui naah hian Pu RK Nithanga, Director MAMETI, Pu Rohmingthanga DD Planning, Pu James Lalsiamliana DAO Serchhip leh thawktu dangten an tawiawm bawka, N. Vanlaiphai SDO Civik, Pu Dinsanga MCS leh Chekawn khawtlang hruaitute leh leilet neituten an lo dawngsawng a ni.