Vawiin khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chuan Chawngte, Parva-I, Lawngtlai leh Siaha a tlawh a, Governor hi Minister of State leh Tuichawng bialtu MLA ni bawk Dr.B.D.Chakma leh Secretary, District Council & Minority Affairs Pu Rodney L.Ralte ten an tawiawm a ni.

Mizoram Governor chuan Chawngte tlawh hmasa berin CADC hnuaia hmalakna thenkhat - Govt. Kamlanagar College sak mek lai, Kamlanagar Bazar hmun leh kawng siam te a hmunah a enfiah nghal a, CADC CEM Pu KK Tongchangya, Council Member dangte leh sorkar officials engemawzatin an tawiawm bawk a. Hemi hnuah hian Governor lawmna inkhawm CADC Rest House-ah neih a ni a, Governor chuan thusawiin CADC hnenah hmasawnna atana sum pek chu dik taka hmang turin a chah a, dan lova hnalak pawh pawmpui a ni lovang, a ti. Mizoram chhunga hnam leh sakhaw hrang hrang awmte chu inunauna thinlung put a pawimawh a, ram hmasawnna turin tanrual a pawimawh hle a ni, a ti. CADC huamchhung chu literacy rate-ah dinhmun hniam an luah reng chu a ngaihmawh thu sawichhuakin Governor chuan zirna leh hriselna kawngah pawh tan la zual turin a hrilh. Chawngte area-a mobile connectivity chhe lutuk chu ngaimawhawm tiin BSNL hotute nen he an harsatna sutkian dan tur a sawipui tur thu a hrilh bawk.

Lawngtlai-ah DC Dr.A.Muthamma leh LADC CEM Pu V.L.Hmuaka bakah LADC Member leh sorkar officals ten an lo hmuak a, LADC Conference Hall-ah Governor lawmna inkhawm an lo buatsaih bawk. He inkhawmah hian Lawngtlai DC chuan an district chhunga an hmalakna hrang hrang a tarlang a. Governor Pu Nirbhay Sharma pawhin thusawiin kum reiloteah Mizoram chu Southeast Asia leh India inpawhna tur kawngpui ber a nih dawn avangin mipuite chumi hun atan inpeih a pawimawh a ni, a ti. Lawngtlai Water Supply Scheme hnathawh zawh tep tawh chu lawmawm a tih thu a sawi a; zirna leh tawng dang thiam belh ngai pawimawh turin a hrilh bawk.

Mizoram Governor Pu Nirbhay Sharma chuan Siaha khawpui tlawh lehin hetah hian MLA Dr.K.Beichhua, Siaha Addl DC Pu N.Ckhakhai, MADC CEM Pu R.T.Zachono, MADC Member leh sorkar officals ten an lo hmuak a. Governor lawmna inkhawm Siaha Circuit House-a neihah Governor chuan kalkhawmte hmaaah thusawiin sipai lakna tur atan thalaite training buatsaih a nih mek chu a lawmawm hle a ni, a ti a. Zirna, inkalpawhna, hriselna leh zuk leh hmuam do ngai pawimawh turin a chah bawk.

Vawiin vek khan Mizoram Governor chuan Parva tlawhin he hmuna BSF leh Assam Rifles awmte chu kawmin ramri venna hna an kalpui dante sawipuiin, an chhehvela awm hnam hrang hrangte chu zirna leh hriselna lama hma an sawn theih nan theihtawp chhuah sak turin a chah.

Mizoram Governor hi vawiin tlai vek khan Aizawl a lo kir leh a ni.