Vawiin khan Naupangte Ni denchhenin Lawngtlai District Institute of Education and Training (DIET) chuan CYLA Hall, Lawngtlai-III-ah middle sikul naupangte tana hnam lam hmanga intihsiak (Cultural Dance Competition) an buatsaih a. Lawngtlai DC Dr A.Muthamma-in a hmanpui.

Lawngtlai DC chuan naupangte tana intihsiakna tha tak buatsaih a ni chu lawmawm a tih thu a sawi a. Intihsiaknaah chuan chak aiin tel ve chu a pawimawh zawk a ni tiin, eng kimah theihtawp chhuah zel turin zirlaite a fuih a. Retheihna um bona tha ber chu zirna a ni a, zirlaite tih tur pawimawh ber chu lehkha zir a ni tiin, tih tak zeta kan beih phawt chuan engah pawh hlawhtlinna a awm a ni, a ti.

LADC-a Art & Culture Officer Pu T.Chalnghingluaia pawhin thu sawiin, hnam a boral mai lohna tura hnam ziarang humhalhna tha tak chu hnam lam hi a ni tiin, kan hnam lam hi kan chawilar a, naupang kan nih atanga kan thiam phawt chuan kan hnam ziarang humhalhna kawngah kawngro a su ngei ang, a ti.

He hun hi Pi R.Lalruatkimi, DIET Lecturer chuan a kaihruai a. Pi Ngurhmingliani Chinzah, DIET Principal chuan kal khawmte lawmna thu sawiin, hnam lam hmanga naupangte rilrua ram leh hnam hmangaihna leh ngaihhlutna tuh chu intihsiak an buatsaih chhan bulpui ber a nih thu a sawi.

He Cultural Dance Competition hi Lawngtlai khawpui chhunga middle sikul te tana buatsaih a ni a. Govt Middle School 9 leh Private Middle School 3, an vaiin sikul 12 te Chawnglaizawn leh Sarlamkai hmangin an intihsiak a. Govt Model English School chu a pumpuiah pakhatna niin, pahnihna Electric Veng Middle School leh pathumna Downtown English School te an ni. Pakhatna hian Rs 15000/-, pahnihnain Rs 12000/- leh pathumnain Rs 10000/- an dawng a. Sikul pahnihin consolation prize Rs 5000/- ve ve dawngin, a bak zawngin participation prize Rs 3000/- theuh an dawng bawk.