Vawiin khan Lawngtlai District Child Protection Unit, District Legal Services Authority leh World Vision : India te tang kawp buatsaihin Lawngtlai DCPU office-ah Naupangte Ni lawmna hun hman a ni a. Hemi puala a thlawna inentirna buatsaih chu Chief Judicial Magistrate Pu Laldinpuia Tlau chuan a hawng.

Pu Laldinpuia Tlau chuan naupangte pawimawhzia leh an dikna chanvo humhalhsak a tul thu a sawi a. UN duh dan angin, naupangte chuan taksa pumrua, khawvel finna leh Pathian hriatnaah hmasawnna an changin, venhimna an dawng tur a ni a; an chungthu-ah tel vein thu an nei ve tur a ni a; khawvel hi nuam taka an hman theih nan an mamawh eng kim ngaihtuahsak an ni tur a ni, a ti. Pu Laldinpuia Tlau chuan mi tihdam leh an hrehawmna tihkian leh damlote thlamuan chu doctor-te mawhphurhna pawimawh tak a nih thu a sawi bawk.

Lawngtlai District Hospital-a Medical Officer Dr Zothanpari pawhin naupang enkawlna kawnga hriat tur pawimawh tak tak a sawi a. Naupang chu hmawmsawm pek tam loh tur a ni a; a theih chin chinah nu hnute ngei pek a tha tiin, naupangte bula zuk leh hmuam tih kawngah pawh insum a tul thu a sawi.

He hun hi Lawngtlai DCPU-a Protection Officer Pi Lalrithangi’n a kaihruai a. World Vision : India (CADP)-a Coordinator Pu HL Rinawma chuan kal khawmte lawmna thu a sawi a. DCPU-a Legal Probation Officer Pu Tommy Hmingdailova’n lawm thu sawiin hun a khar a ni.

Free Clinic atan hian Aizawl atangin naupang specialist doctor chah chhuah a ni a. Nilengin inentirna hun hi buatsaih a ni.