Vawiin khan Agriculture Minister Pu R Lalzirliana chuan Mizoram Agriculture Service Association (MASA) General Conference vawi 5-na chu Berawtlang Tourist Lodge-ah a hmanpui.

Agriculture Minister Pu R Lalzirliana chuan Agriculture Officer-te thawhrimna chu fakawm tiin ei leh bar a intodelh chu sum tamtak aiin a hlu zawk a ni a ti a, scheme leh project hrang hrang te uluk taka lo zir thin turin kalkhawmte a chah a, Minister chuan Mega Block-ah pawh kan ramin ei leh barah harsatna kan tawk lo chu Pathian malsawmna a ni, a ti. Tunah hian kuthnathawktu te tan eizawnna ngialnghet leh rahbi thar rual rem zawk an neih theih nan sawrkarin NLUP hmangin chak takin hma a la chho mek a, tunlai thiamna, System of Rice Intensification (SRI), Improved Package of Practices (IPP) leh Hybrid Rice Technology (HRT) hmangin buh thahnem tak kan ramin kan thar mek bawk a ni, a ti. Kan ram dinhmun thang zel turah hian Oil Palm hi kuthnathawktu te’n an chhawr tangkai mek a, hectare 18,000 vel lai maia zaua chin mek a nih chu lawmawm a tih tak zet thu sawiin Department Officer-te chu thuthmun atang ringawt ni lovin, a hmunah ngei enpui a, zirtir thin turin a chah bawk. Tlang ram lo neih chu zaa sawmnga velin a tlakhniam tawh thu sawiin Minister chuan, lo neih aia hlawk zawk lei rem leh leilet-ah thlai chin leh buhthar an duh tawh zawk a ni a ti. MASA member-te chu an finna leh thiamna-te ram tana hlawk thei ang bera thawk a, an service hamthatna, mamawh leh an harsatna hrang hrang- te chu sawrkar-in vawi leh khatah an mamawh phuhruk nghal vek lo mahse theihtawp an chhuahpui thin thu a tarlang a ni.

Inlawmna thusawitu Agriculture Director (CH) Pu C Lalzarliana chuan tun sawrkar ministry-in an Department tana thil hrang hrang a tihsak te tarlangin, Mizoram mai nilo North East State zawng zawng tana tangkai pha tur Indian Institute of Oil Palm Research (IIOPR) leh Mizoram sawrkar tangkawpin Oil Palm Seed Garden min siamsak a, hei hian Mizoram chu Oil Palm chinna hmun pawimawh lehzualah a hlang chho ta a ni, a ti.

General Conference hi MASA President Pu R.K Nithanga’n a kaihruai a, General Secretary leh finance secretary atangin report ngaihtlak a ni. Minister hi Agriculture Additional Secretary-in a tawiawm a ni. Chawhnu lam hun hi rorel inkhawm leh an thawhpui pathum pension thlahna programme atan an hmang nghal bawk a ni.