State Vector Borne Disease Control Programme hnuaiah vawiin khan Mamit khawpui chhunga hman turin Chhimveng VC huam chhung mipuite tan thosilen sem a ni.

Hemi pual inkhawm tawi Chhimveng YMA Hall-ah neih niin Dr Hmingthanmawii CMO Mamit chuan a kaihruai a, Dr Lalremmawii (Dy Director-Malaria) Aizawl chuan rawn hmanpuiin Mamit District chu Malaria tamna hmun leh fimkhur ngai tak a ni a, Malaria laka mipuite kan him theihnan chhungtinten Thosilen damdawi chiahsa kan dawng hi lawmawm hle a, a nihna tur ang taka hmang turin leh zar duh lo te chu laksak leh theih an nih thu a sawi a, mahni thua lo thui danglam emaw theih a ni lo a, ASHA ten intinah mipui ten kan zar tha em tih an rawn endik leh vek dawn a ni a ti, Malaria laka kan him ngei theihnan a nihna tur ang taka hmanga thosilen tha taka zar turin kalkhawm mipuite a chah a ni.

Dr K. Vanlalhruaia, Consultant, District Vector Borne Disease chuan Thosilen dawngtute tan a enkawl dan leh Mamit District in Sikserh Malaria kan vei dan dinhmun tarlangin Kum 2015 chhung khan Sikserh Malaria vang hian mi 5 in nunna hlu tak chanin mi 10 zela pakhatin Malaria hrik pai ang kan nih thu a sawi, Mamit District tan Long Lasting Insecticidal Nets (Damdawia chiahsa thosilen) 72603 sem chhuah tur niin hei hi District Headquarters atangin PHC/CHC ah sem chhuah vek tawh a nih thu a sawi a, he damdawi hi kum 5 chhung damin, vawi 20 suk thleng a daih a ni a ti, kum 2011 ah khan thosilen 10000 Mamit District ah sem a lo nih tawh thu a tarlang bawk. Mamit khawpui chhung V.C bial hrang hrangah tunkar chhung hian sem chhunzawm a ni ang.

Pu Lalrindika President Chhimveng V.C in thusawina a nei bawk.