Vawiin ah khan Mizoram Governor Lt. Gen Nirbhay Sharma (Retd.) leh a nupui Lady Governor Jyotsna Sharma te chuan Kolasib an tlawh.

Kolasib Circuit House ah Deputy Commissioner H.Lalengmawia leh Head of Department te kawm hmasa in District chhunga hmalakna hrang hrang te a zawt a. Diakkawn YMA Hall ah ma puala buatsaih, Vantlang inkhawm ah a tel leh hnu in Salvation Army enkawl, hnuchham run a tlawh a. Governor te nupa chuan he hunah hian hnuchham run a naupang te nen inkawmna nei in tanpuina thil pek an hlan a ni. Khawchhung a hun an hman zawh hnu hian sawrkar mi pawimawh te nen Serlui ‘B’ Hydel Project an tlawh a. Serlui ‘B’ Dam hmun ah hian Engineer te leh NEEPCO official ten an lo dawngsawng a. Serlui ‘B’ Hydel Project kalpui mek chungchang leh hmalak a nih dan te Power & Electricity Engineer ten an lo hrilhfiah bakah Tuirial Hydel Project a hmalak mek chungchang pawh NEEPCO Official te hnen atanga ngaihthlak a ni.

Kolasib mipui te hma ah thu sawiin Governor Lt. Gen Nirbhay Sharma (Retd.) chuan tlawmngai pawl, kohhranmi te leh sawrkar thawhhona tha tak chu Mizoram chakna hnar a ni a ti a. Neihsum, chibing leh sakhuanna avanga inthliar hranna awm ve lohna hmun a nih piah lamah ziak leh chhiar thiam tamna a nih avangin Mizoram hmabak a en thu a sawi a. Kum 5 dang lo awm turah phei chuan Mizoram hian nasa takin hma a sawn tawh dawn a ni a ti. Mipui nuai 10 chuang emaw chiah awmna, tawng pakhat in hmantawm na state chu state tih hmasawn har lo ber nia a hriat thu sawiin Mizoram a mi cheng tlemna chu remchang ah sawrkar hnathawk leh hmalatu ten hmang se a sawt hle ang a ti a. Governor chuan, “Rel kawng, KMMTTP kawngpui, National highway tihlen leh Border trade lo puitling in a rawn ken tur hmasawnna nasa tak lo dawngsawng turin Mizo thalaite an lo inpeih hman lovang tih ka hlau hle a. Heng hmalakna te hi kum reilo te chhunga puitling tur a ni a, Mizo thlaite an lo inbuatsaih hmanloh chuan hmasawnna tel tu ni lovin hmasawnna thlirtu an ni hlauh dah ang tih ka hlau hle a ni”, a ti. Khawvel changkang mek ah inhung binga awm reng a theih tawh loh thu tarlang in Mizo mipui te tan rilru zau zawk pu a nasa zawnga inhawn zau a hun tawh tih a tarlang a. Hnamdang leh hmundang atanga thiltha Mizoram ah senglut a, Mizo khawtlang nuna thiltha leh mawi te pawh midang te hrilh chhawn zel chu hmasawn tum, Mizo thalai te tana pawimawh hmasa a ni a ti. Kolasib District hmasawnna a hmuh a vanga lawm awm a tih thu sawiin remna leh muanna rah a nih thu a tarlang a. Kolasib leh District dang te chu district entawn tlak nih inchuh in intlansiak se Mizoram in a that pui ngei ngei ang a ti.

Sawrkar hnathawk te nen an inkawmna ah hian District chhunga hmalakna leh dinhmun tlangpui te Kolasib DC Pu H.Lalengmawia’n tarlang a, Pu C. Lalzahngoa, SP, Kolasib in District chhunga Law & Order chungchang report tawi a pe thung. District report chuan Kolasib District ah chenna in 15,799 awm mek in chungah chuan mipui 83,955 an khawsa mek niin a tarlang a. Sub division 3, RD Block 2, Khum 64 awmna Civil Hospital 1, Zirna chi hrang Department 14 awmna College 1, Jail tang 114 awm theihna District Jail 1 leh Higher secondary school 3 Kolasib District ah hian a awm a. Kolasib district mipui 93.5% chu ziak leh chhiar thiam an ni a, lehkha ziak leh chhiar la thiam lo mi 2101 an awm a ni. Kolasib District ah Police 219 awm tur ah 192 awm mek in police stations 4 a awm tih district report chuan a tarlang.