Vawiin chawhnu khan Rokunga Hall, Venghnuai ah Mizoram Upa Pawl (MUP) Aizawl South II Area Conference vawi 25-na hman a ni a, Social Welfare Department Minister Pu P.C. Lalthanliana chu khuallian a ni.

Pu P.C. Lalthanliana chuan kan ram siam tha turin pawl pathum pawimawh deuh deuh sawrkar, NGO leh kohhrante kan awm a, lungrual taka ke kan pen thin anih chuan hma kan sawnin kan hnam hi a tlu chhe lo ang a, indo tawn zawnga kan kal erawh chuan tluk chhiat lam kan pan dawn a ni, a ti. MUP palaite chu kan hnam rohlu leh chin dan tha bo mai tur venghimtute in ni tiin kan ram kal zelnaah hmun pawimawh tak in awh theuh a ni, a ti bawk. Minister chuan chawimawi tur dik tak chawimawi loh a hlauh thu sawiin, sawrkar atanga beisei lam ringawt nei lova enge sawrkar leh kan ram hmasawn nan ka tih theih ang ti a sawrkar ti chaktu leh thapui ni turin lo kal te chu a sawm a ni. Khuallian hian Conference-a palai lo kal mipa leh hmeichhia upa berte hnenah lawmman a hlan nghal a ni.

Conference hi session hnih a then niin, a hmasa zawk hi Area President Pu C.L. Dawngliana kaihhruaiin rorelna neih a ni a. A hnuhnung zawk hi Area Vice President Pu C. Hmingthanga’n a kaihruai ve thung a ni. Hemi hunah hian MUP Gen. Hqrs. aiawhin General Secretary Pu Sainghinga Sailo in thu a sawi bawk a ni.