Tunlai hian Zirtirtu indaihlohna chungchang media thenkhatah tarlan a ni thin a. School Education Department dinhmun tlangpui chu hetiang hi a ni.

Mizoram pumah Gov't Middle School Headmaster neilo sawmkua pakhat (91) lai an awm a. Sorkarin heng hmun ruak hnawhkhah nan hian phalna a pe tawh a. Department-in chak thei ang bera bawhzuiin tunah hian MPSC-ah DPC Meeting nei tura chhawpchhuah mek a ni tawh a. Tihfel a nih veleh promotion hmu tharte chu heng hmun ruakah te hian dah tum a ni. Chu chuan Headmaster neih loh avanga school harsatna tawh mek chu enge maw chen a sutkian a beisei awm.

Govt. High School-ah hian rampumah Headmaster nei lo sawmthum pariat an awm a, Mathematics/Science subject zirtirthei ( B.Sc) neilo school pakua an awm a, B.Sc pakhat chauh nei school sawmnga (50) lai awm mek zingah Gov't Thingsai H/S pawh hi tel vein a ziaawm pawl a ngaihtheih an ni. Science leh Mathematics subject la thei zirtirtu indaih lohna hi a chhan pakhat chu tun hma atangin Mathematics/Science Teacher bik lakna tur Dan / Recruitment Rules a awm loh vang a ni. Tunah chuan Mathematics/Science teacher lak theihna tur a hranpa liau liau in rules siam a ni ta a. Hei hian Mathematics/Science Teacher indaihlohna pawh nasa takin a phuhruk theih beisei a ni bawk.

Tun dinhmunah chuan School hrang hrangte zirtirtu indaihlohna hi rang taka sutkian mai dan a awm rih lova. A tul ang leh theih ang angin hma lak mek zel a ni. School Education Department changtu Minister leh Parliamentary Secretary te bialahte pawh Headmaster leh Zirtirtu indaihlohna hi a awm a ni. Chuvangin a theih ang anga sorkar hma lak mek te hi ngaichanga hrethiam tur in School Education Department chuan mipuite a ngen ani.