Vawiin khan Champhai DC Pu Vanlalngaihsaka hovin Champhai DC Conference Hall-ah kumin Sorkar kum chhunga District Level Review Committee, District Consultative Committee and District Level Security Committee (DCC/DLRC/DLSC) meeting vawi thumna chu neih a ni a. He meeting, State Bank of India, Lead Bank Office, Champhai bul tuma neihah hian Champhai District chhunga Bank hrang hrang hotute leh Sorkar Office hotu thenkhat an tel a. October atanga December thla chhunga an hmalaknate leh harsatna an tawhte sawiho a ni.

Meeting Chairman Pu Vanlalngaihsaka chuan thu sawi hawnna neiin, bank ten target an neih ang angte chu mipuite hamthatna tur atan siam a ni tih hre rengin tihlawhtling tuma hma la zel turin a sawm nghal a ni.

Vawiin meeting-ah hian meeting hmasaa an thurel tawhte chu thlirletna bakah hmalakna tur hrang hrangte an sawiho a. Thla khata vawi khat tal Financial Literacy Camp (FLC) buatsaih tur a tih chu branch tam zawkin kalpui tawhin, a aia nasa zawk a kalpui zel tura rel a ni a. Pradhan Mantri Jan Dhan Yojana (PMJDY) hmalakna hnuaia chhungkaw tin atanga mi pakhat talin bank account hawng tura hmalakna te, Periodic Patte renew chungchang te, MPDR Act chungchang leh Agricultural loan leh non-farm sector hrang hrang atana loan pekchhuah zat te leh Self Help Group tanpuina atan target te sawiho a ni a. Venhimna kawnga Bank te dinhmun sawiho a ni bawk.