No.3038/2021-2022
Aizawl, the 18th November 2021: Vawiin khan Agriculture Minister Pu C.Lalrinsanga hovin a Office Chamber-ah Mizoram pum huapa Agriculture Department hnuaia hmasawnna hmalakna kalpui mek te thlir ho a ni a. Mizorama Agriculture tih hmasawnna tura hmachhawp hrang hrang te pawh sawiho a ni bawk a ni.

Pu C.Lalrinsanga, Agriculture Minister chuan Climate change effect avangin kan khaw awmdan a lo danglam tak zia te a sawi a. Agriculture Department pawhin hei hi en liam mai lova Climate change effect lo awm tur do let tura Department ang pawh lo inpuahchah a tul thu a sawiin District tin ten District Agriculture Contingency Plan mumal tak an siam theuh a tul thu a sawilang bawk a ni.

Agriculture Minister chuan Agriculture Department hnuaia Scheme hrang hrang te mumal zawka Convergence kalpui a nih theih nan District Level Co-ordination Committee din anih tawh thu leh District thlan bikah Line Department dang te nen thazawka thawhhona a awm theihna tura District Level Coordination Committee (Agriculture & I&WR) siam anih thu a sawichhuak a. Mumal zawka District Agriculture Plan siam thuai a tul thu a tarlang bawk.

He hunah hian District Agriculture Officers ten hmasawnna hrang hrang an kalpui te report kimchang an pe a. Kumin (2021) hi kum dang ai a fur ruahtui mumalloh avanga loneitu thenkhat ten a hun taka thlai an chin theih loh avanga buaina an tawh chungchang te leh buhseng laia ruahtui tam lutuk avanga loneitu thenkhat, a bikin Buh chingtuten buaina an tawh chungchang pawh sawiho a ni bawk.

Meeting-ah hian Agriculture Department in Scheme hrang hrang kaltlanga hmasawnna hna an thawh te leh heng scheme atanga achievement report te sawiho a ni a. WRC bikah Buh chin zawha thlai dang chin dan tur (Cropping system) chungchang, kumkhat chhunga thlai vawi thum (3) tal thar thei tura hma lak dan te leh Data collection chungchangah mumal zawk a ruahmanna kalpui dan tur te sawiho a ni bawk.

Meeting-ah hian Pu J.Hmingthanmawia, Secretary, Agriculture, Pu Rohmingthanga Colney, Director, Agriculture Department, Pu James Lalsiamliana, Additional Director (Crop Husbandry), Pu James Vanlalluaia, Additional Director, Research & Extension, Deputy Director te leh District hrang hrang atangin District Agriculture Officer te an tel a ni.