1180/2023-2024

Dated Saitual the 18th July, 2023: Vawiin khan Saitual District A.H& Veterinary Office chu A.H& Veterinary Minister Er. Lalrinawma'n a hawng a. Pu C. Lalmuanpuia ,MLA, Veterinary, Fishery & Sericulture Board Vice Chairman chuan he hun hi khualzahawm niin a hmanpui bawk.

Hawnna inkhawm Keifang Venghlun YMA Zawlbuk a neihah hian AH&Vety Minister, Er. Lalrinawma chuan thu sawiin Sawrkar chuan theihpatawpa District te tih changtlun chu a ngai pawimawh hle a ni, a ti a, Saitual District pawh hmasawnna chi hrang hrang hmuh theih a a awm chu a lawmawm a tih thu sawiin, District office te pawh hawn belh zel a nih a beisei thu a sawi bawk.

AH & Vety Minister chuan ran pawimawh zia sawiin rante chu mihringte chenpui atana Pathian in a duan lawk an ni, a ti a, ranvulh chu Mizoram chakna lakchhuah nana thahrui pawimawh tak a nih thu sawiin ran chaw pawh man tlawm leh tha ranvulhtuten an neih theih nan hmalakna pakhat atan Lengpuiah ran chaw siamna hmun ‘Sustainable Animal food Distribution System to check inflation of meat and its end product, Mizoram under Special Assistance to State for Capital Expenditure (SASCE) 2020 – 2021’ lungphum phum a nih tawh a ni, a ti.

Er. Lalrinawma chuan District Vety Office chu mipui ten chhawr tangkai an thiam a ngai a ni, a ti a, Saitual mipui te tan chenfakawm tak a nih chhoh zel a beisei thu a sawi.

Khualzahawm Pu C. Lalmuanpuia MLA, Vice Chairman, SEDP Board pawhin tun hnai maia Saitual a Department 2 - Vety leh Sericulture Department hawn theih a a awm chu a lawmawm a tih thu a sawi a, hei hian sawrkar hmalakna a pho lang a ni, a ti.

Pu C Lalmuanpuia chuan Vety Department chu mipui ah a tla na hle a, sawrkar flagship Program, SEDP ah pawh AH & Vety kaihhnawih thlang tu an tam ber a ni, a ti a. Mizo te rilru ah ran vulh a len thu sawiin, in lama vulh chi Ui leh Zawhte te thlengin mihringte nen inlaichinna thuk tak a awm a ni, a ti a, heng ran te tha tak leh hlawk taka enkawl annih theih nan Vety department hmalakna te chu tawiawm thiam a pawimawh a ni, a ti. Ranvulhtuten vawk chi tha, sial leh kel chi tha an neih theih nan tunlai thiam na hmangin Vety Department chuan tan an la nasa hle a ni, a ti a, hmasawnna chak tak hmuh chhoh zel a beisei thu a sawi bawk.

Saitual DC, Dr Lalngura Tlau pawh in thu sawiin District chhunga Department hawn belh zel a ni chu hmasawnna chak tak a ni, a ti a. Saitual District khaw 40 zinga khaw tamzawk ah ranvulh lama hmasawnna tur a tam hle a ni, a ti. Vety Department hruaitute hnenah chuan Saitual District tlangdung chu ngaihven zui zel turin a chah a. Hemi rual hian Saitual a la awm lo Department pawimawh tak Social welfare leh Excise Department te a din thuai theih nan theihtawp a hma lak sak turin Minister chu a ngen nghal bawk.

Hawnna inkhawm hi AH&Vety Department Additional Director Dr C Lalrintluanga chuan a kaihruai a,Dr C. Zarzokima, Jt Director (P&M) in report a pe a, Dr Ch. Lalthafamkima, DVO, Saitual in lawmthu sawina a neih hnu in hawnna inkhawm hi khar a ni.

Tun dinhmunah Saitual District  AH&Vety Office hian District Vety Hospital 1 an nei a,  Veterinary Dispensary 4, Animal Health Centre leh Mobile Veterinary Unit te an nei a ni.