1181/2023-2024

Khawzawl, 18th July 2023: Vawiin khan Nehru Yuva Kendra (NYK), Champhai buatsaihin Govt. Khawzawl College-ah ‘Yuva Utsav Khawzawl District Level Youth Festival’ neih a ni a. He hun hi Dr. Vanlaltanpuia, MLA, Mizoram Youth Commission Chairman ni bawk chuan khuallian niin a hmanpui.

Khuallian Dr. Vanlaltanpuia chuan he hunah hian thu sawiin Thalaite chu khawvel siamthatu tur an nih angin, nun uluka, invawnna leh tumruhna nena hun an hman a ngai a ni, a ti a. Thalaite chu ram hmasawnna thlentu an nih ngei theih nan an tum ti sang a, an hriatna tizau turin a fuih a. India ramah hnathawk thei lo aiin thalai hnathawk thei an tam zawk (demographic dividend) tak thu sawiin khuallian chuan he hun tha chhawr tangkai turin sawrkar pawh a inher rem mek zel a ni, a ti. A tha zawnga thiamna leh theihna hman a nih chuan hmasawnna hi a hla lo a ni, a ti bawk.

MYC Chairman chuan Mizoramin zirna kawngah hmasawn a mamawh tak zet thu a sawi a. Mizo thalai ten UPSC Civil Service Exam an paltlang ngei theihna tura MYC hmalakna te tarlangin, Mizoram sawrkar hmalakna hian rah tha a chhuah ngei a beisei thu a sawi bawk.

Khuallian hian intihsiakna hrang hranga zirlai titha te hnenah lawmman a hlan nghal a ni.

Vawiin programme hi Pu PC. Lalrindika, Assistant Professor, Govt, Khawzawl College chuan a kaihruai a. Principal Pu K.Ziona’n inlawmna thu sawiin, Champhai Nehru Yuva Kendra District Youth Officer Pu Dinesh K.Jangid pawhin thu a sawi bawk.  Dr. Lalliantluanga Ralte, Assistant Professor in lawmthu sawiin inkhawm hi tihtawp a ni.