1182/2023-2024

Dated Saitual the 19th July 2023: Vawiin khan Saitual DC Conference Hall-ah Mizoram Legislative Assembly General Election 2023 inthlan lo awm tura Sector Officer/Magistrate mi 15 ten Training an nei.

Vawiin a Sector Magistrate training ah hian District Election Officer, Dr. Lalngura Tlau chuan Saitual District in District a nih atanga MLA General Election a hmachhawn vawikhatna tur a nih angin Magistrate training tura kalkhawmte chu an duty na huamchhunga Polling Party tinte enkawl dan ah te , Report pek dan ah te, inthlanna hmanrua EVM leh VVPAT a harsatna awm thei hrang hrangte chinfel dan tur leh report dan ah te fimkhur leh uluk taka an ngaihtuahna hmang turin a chah a, Election felfai tak neih theih nan leh mitin in zangkhai taka vote an thlak theihna tura thawk ho turin a sawm a ni.

Election Commission-in inkaihhruaina a siam angin Constituency pathum te chu sector 15 ah then a ni a, sector khat hi Sector Officer/Magistrate pakhat-in a vil anga magisterial power pek an ni nghal bawk ang. He training-ah hian Pu Remlalliana Hnamte, State level Master Trainer leh Pi. PC. Zonuntluangi, Master Trainer ten Election Commission in Sector magistrate hna tura a tarlante chu zirtirna an pe a ni. Sector Magistrate kal khawmte hian an hriatthiam loh laite, harsatna la awm palh thei thilte leh chung a lo thlen palh pawha chin fel thuai a nih theih dan turte zawtin an sawi ho a ni.

Sector Magistrate te hi tih tur pawimawh hrang hrang heng; inthlanna hmun hma buatsaih te, inthlan hmaa a vote thlak tu turte hrilh hriatte, inthlan ni a thlen dawn a en fel tur thilte, inthlan ni a an tih turte, inthlan zawh hnua an tih fel tur hrang hrangte siam sak an ni.

Saitual District hian District Administration hran an neih hnu in MLA General Election a hmachhawn vawikhatna tur a ni a, District hnuaiah hian Assembly constituency pathum, 8 Chalfilh (ST) AC 9 Tawi (ST) AC, 21 Lengteng (ST) AC awmin Voters 18417 an awm a ni.