AH&Vety. Consultative Committee MLA rualkhat te chuan Minister Pu Nihar Kanti Chakma hovin vawiin khan Lunglei bula Pukpui-a Model Piggery Village chu a hmunah an tlawh. Minister chuan hetianga Consultative Committee meuhvin an tlawhna chhan tarlangin sorkar atanga sum ruahman a tawp tak avanga he Piggery Village hi engtianga kalpui zel tur nge tih a hmuna thlithlai tur an nih dan te, vawkvulhtu chhungkuate ngaihdan la tura kal an nih thu a sawi.
Consultative Committee member-te Pu P.P.Thawla, Pu R.Lalrinawma, Pu R.L.Pianmawia te pawhin he Village an hmuh dan tlangpui an sawi hlawm a. Tui lama harsatna an neih te, ranvulh baka huan leh thlai siam dan tur te leh rinawm leh taima taka thawh chu hlawhtlinna bul a ni tiin thurawn an pe a ni.

Khawtlang hruaitu leh Welfare Committe te chuan an harsatna thlenin sorkar atanga tanpuina tawp tawh mahse, hmun hrang hrang atanga kalkhawm, hmun dangah in leh lo neilo te an nih avangin tuna sorkarin in a sak sak leh ram a then te chu anmahni puala pek ni thei se, thingtlang khua pakhat anga enkawl zui nise an duh thu an sawi a ni. Heng an thil thlen te leh a hmuna an vawk vulh te en vek hian sorkar chuan an kal zel dan turah thutlukna a siam tur thu Consultative Committee hian a hrilh.

Pukpui Model Piggery Village-ah hian chhungkua 60 an awm mek a, vawk 50 zet an vulh mek a ni. A hmun zau zawng hi 60 hectares vel a ni.