Vawiin khan Consultative Committee under AH&Vety chu an Chairman AH&Vety Minister Pu N.K.Chakma hovin a office chamber-ah an thukhawm a, AH&Vety department hmalakna hrang hrang thlen tawh chin leh harsatna an tawh mekte sutkian dan tur an sawiho a ni.

AH&Vety department-in Hmunmawi, Kawlkulh; Pukpui, Lunglei leh Sairang Aizawl hmuna Model Piggery Village dinte chu a bultumtu ber sorkar laipuiin sum sanction a tihtlem avangin a enkawlna lamah harsatna an tawk mek a. Vawiina Consultative Committee thukhawm chuan heng Piggery Village-te chu a hmun ngeia enfiah a, hmalak dan tur sawiho leh an rawt a ni. AH&Vety department-in heng piggery village enkawlna tur an ruahman theih si loh chuan department dangte nena tanghova enkawl emaw mimal/pawl hnenah lilam mai tura rawtna te pawh siam a ni.

Vawiina Committee-in an sawiho zinga langsar zualte chu AH&Vety department hnuaia Lunglei leh Kolasib-a Integrated Dairy Development Project chungchang te, ran talhna hmun Slaughter House sak leh thawmthat chungchang te leh Ramrikawn-a Feed Plant enkawl chhunzawm zel dan tur chungchangte opawh chipchiar takin an sawiho a ni.

Consultative Committe-ah hian Chairman Pu N.K.Chakma, MLA Dr.R.Lalthangliana, Pu P.P.THawlla, Pu R.Selthuama (Chairman, NLUP Implementing Board ni bawk), Pu R.Lalrinawma, Pu R.L.Pianmawia, AH&Vety Secretary Pu R.K.Singha bakah AH&Vety Director Pu L.B.Sailo leh department officials engemawzat an tel a ni.