No.4023/2021-2022

Aizawl the 17th February, 2022: Fostering Climate Resilient Upland Farming System in the Northeast (FOCUS) project kaltlanga A.H & Vety. Department, Champhai District-in FOCUS Project first installment kaltlanga 'Mithun Shelter-Community Level and Water Supply Facility for Grazing Area’ tih hnuaia khawtlangin an inhman tawm theih Se in Ruantlang Sabual rama siam chu vawiin chawhnu dar 1:00 khan Dr. H. Laltlanmawia, Director, A.H & Vety. Department chuan hman theih turin a hawng.

Thusawiin Dr. H.Laltlanmawia chuan A.H&Vety Department kaltlanga FOCUS hmalakna hmanga khawtlang tana Se In leh hawn a ni ta chu lawmawm tiin, Se vulhtute leh ram neitute inpekna fakawm a ti a. Undivided Champhai District-ah Se vulhtute tan FOCUS kaltlangin nasa taka hma lak a nih thu tarlangin, FOCUS nen tha taka thawhhona neih a ni chu lawmawm tiin, thawhdunna dang Vawk chi sawngbawlna Boar Semen Station Champhai pawh a hma thei ang bera kalpui thuai tum a ni, a ti bawk.

Sial chuan ram duh bik leh that duhna hmun a neih avangin Mizoram khawchhak lam ramri depahte an tam thu tarlangin, sevulh chu eizawnna nghet a nih avangin hmabak eng tak a awm a ni, a ti a. Ran dang anga chawmhrai leh ngaihven reng ngai a ni lo a, tlangram lo neih bansana sik leh sa siamthat mai bakah, sum dehchhuah tipung thei tura hmabak eng tak nei sevulh chu ngaipawimawh deuh deuh tur leh midangte hrilhhe turin ran vulhtute a chah a. Department-in sa intodelh tura tan a lak zel thu sawiin, Se vulhtute chu FOCUS kaltlanga hmalaknate chu tangkai taka hmanga, eizawnna ngelnghet neih theih nana hmang turin duhsakna a hlan a ni.

He hun kaihruaitu Dr. B.Zonghinga, DVO Champhai chuan Sial chu mizote nuna bet tlat leh ngaihhlut tak a nih thu tarlangin, Se in hawn tak chu Se rualte khalhkhawma vaccine pek leh damloh thulha enkawlna hmun tur a nih thu a sawi a. Undivided Champhai District-ah Sial 26,000 awm anga chhinchhiah a nih thu sawiin, UNO hnuai IFAD kaltlanga FOCUS Project hnuaia hmalakna zinga Ruantlang a awm chu a lawmpui thu leh Se In hawn chuan rah tha zawk a chhuah ngei a beisei thu a sawi bawk.

He hunah hian Dr. C. Lalrintluanga, Joint Director (Planning & Monitoring) hnen atangin thusawi ngaihthlak niin, Pu H.Roseia, Chairman, Ruantlang Sevulh Association hnen atangin report ngaihthlak a ni bawk.

Sial in leh tuipekna 'Mithun Shelter Community Level and Water Supply Facility for Grazing Area' tih project hi FOCUS hnuaia thawh niin sawrkar kum kalta khan DVO Champhai huam chin Champhai District chhunga khaw 8; Farkawn, Samthang, Vangchhia, Sazep, Lianpui, Khuangleng, Hnahlan leh Tualchengte bakah, Khawzawl District-a Vangtlang leh Saitual District-a Kawlbem-ahte hawn a lo ni tawh a. A thawhhnihna turin Champhai District-a khaw 5; North Khawbung, Khuangphah, Vapar, Ruantlang leh Vaphaiahte Sial in leh tuikhur hi siam a ni a. North Khawbung, Vaphai leh Ruantlang amite hi hawn fel a ni ve leh a, khaw dang 2 a siamte pawh hawn mai theih tura peih vek tawh an ni bawk.

Se in zau zawng hi a dung feet 36 leh a vang feet 20 a ni a, heng bakah hian Se venna In adung feet 20 leh avang feet 15 siam a ni bawk a. Se in bakah tuitlan tur tuikhur tha tak siam leh tur a ni.

A.H & Vety. Department Champhai chhinchhiah danin Ruantlangah hian Sevulh chhungkua 16 awmin Sial 60 vel an vulh mek a. Kum 2018 atang khan Sial an vulh tan a ni. Sabual ram hi Ruantlang Village Council in Ruantlanga Sial vulhtute tan ran huang atan an pe  a. A ram zau zawng hi Hectare 900 zet a zau a ni.

He hunah hian  Dr. C. Lalsawithuama, DVO Khawzawl, Dr. B.Lallawmsanga, Deputy Director (Livestock Health), Dr. Lallawmkima DIPRO, Dr. Lalrinhlui VO, thawktu dangte, Se vulhtute leh khawtlang hruaitute an tel a ni.