No.4022/2021-2022

Aizawl, 17th February, 2022 : Human Resources Development Board Vice-Chairman Pu L. Thangmawia, MLA chuan Mizo Language Development Board (Draft) Bill, 2022 chu Assembly Budget Session karleh a neih turah put luh a nih tur thu vawiin khan a pisa ah a sawi.

Mizo Academy of Letters (MAL), Mizo Writer’s Association (MWA), Mizo Grammar Society (MGS) leh Mizo Poetry Society hruaitute nen a pisa-a an inkawmhona ah he thu hi sawiin Pu L. Thangmawia chuan Chief Minister Pu Zoramthanga’n Mizo Tawng humhalh leh tihhmasawn an ngaih pawimawh em avangin sawrkar an din tirh veleh atang khan ngaihtuahna an seng nghal tih a sawi a. Human Resources Development Board Chairman, School Education Minister ni bawk Pu Lalchhandama Ralte kaihhruaina hnuaiah theihtawpin an bawhzui a, Mizo Language Development Board din tula an hriat avangin pawl leh mimal ang pawha mithiam engemawzat sawmin tan an la a, hun leh tha tam tak sen a nih hnuah Assembly-a roreltu sang ber ten an pawmpui turin chhawpchhuah a ni dawn ta a ni, a ti a. Hemi kawnga tan latu leh tha thawhtu pawl hrang hrang MAL, MWA, MGS, MPS bakah sawrkar official te leh Study Team member te, mimal thahnemngai zawng zawngte chungah thinlung takin lawmthu ka sawi a, mahni sum leh pai pawh seng hreh lova Mizo Tawng humhalh tura an hmalakna chu a thlawn dawn lo a ni, a ti.

Pu L. Thangmawia chuan Mizo Tawng hi Pathianin mal a sawm a, Zofate min phuarkhawmtu a nih bakah zohnahthlak ten kan intawm theih a nih avangin zohnahthlak hmun hrang hranga awmte zingah pawh inthlahrung lovin kan hmang thei a, Mizo Language Development Board kan nei thei a nih ngat chuan a pawimawh hle dawn a, Mizo hnam hrang hrangte min thendarhtu a nih theih rualin min zawmkhawma min thlung khawmtu a nih theih bawk avangin hnathawh kawngah pawh a fimkhur a ngai hle dawn a ni, a ti a. Mizo Tawng chungchangah a thiamte pawh an inhnial fo a, Mizo tawng ziak dan dik chungchangahte, a lam dan dik chungchanahte leh kawng hrang hrangin Mizo Tawng tihhmasawnna tura thawktu tur a nih avangin mipuite pawhin kan ngaihven a, kan phurpui a tul hle a ni, a ti a. Chutih rualin zohnahthlak peng hrang hrangte tawng pawh ngaih pawimawh tel a tul dawn tih a sawi bawk.

Vawiina pawl hrang hrang aiawh kalkhawmte chuan Mizo Language Development Board an nghahlelh thu an sawi a, Mizo tawng humhalh leh tihchangtlun zelna tur atan hun thar a in herchhuak dawna an hriatthu sawiin, an phur hle tih an sawi a ni.

Pu L. Thangmawia hian Pu Darchuailova Renthlei lehkhabu ziah “Vankhama : A Master of Diction” leh “Vankhama : Thulehthliah Thiam” chu a tlangzarh nghal bawk a, heng lehkhabute hi kil hrang hrang atanga Vankhama hla thlirna a ni.