No.4021/2021-2022

Aizawl, 17th February, 2022 : New Delhi-a cham mek Tourism Minister Pu Robert Romawia Royte chuan nizan khan Union Tourism, Culture leh DoNER Minister GK Reddy chu hmu in Tourism Ministry-in Mizoram tana sum installment pek chhuah tur a la neih te pe chhuak thuai turin a ngen a. Hei bakah hian a thuphunga sanction tawh, PRASAD scheme pawh release vat a nih theih nan projects hmunhmate rawn endik tura inspection team rawn tir thuai turin a ngen bawk.

Union Minister nen hian DoNER Ministry hnuaia hmalakna tur thil dangte pawh an sawidun a.  Union Minister chuan Pu Roberta thil sawite chu a theih ang anga lo bawhzui a tum a ni.     

Pu Robert Romawia hi Union Finance Secretary Pu Somanathan leh Pu Ajay Seth, Secretary, Department of Economic Affairs te nen pawh thukhawmin Finance Ministry hnuaia Sports leh Tourism projects te rang zawka sanction a nih theih dan tur te an sawiho a. Rural Electrification Corporation(REC) leh Mizoram State Sports Council(MSSC) ten REC Motosports Racing Tract & Sports Complex, Lengpuia sak tur chungchanga Inremna Thuthlung an ziak pawh telpuiin Pu Roberta chuan “India ram leh hmarchhak thalaite mamawh em em, Bike leh Motor intlansiakna tur Tlankawng nei hmasaa Mizoram a tang chu vanneihthlak a tih thu a sawi a. A hun taka siam zawh a nih theih nan MSSC in tan a la ang” a ti.     

Tourism Ministry sum Rs 4000 Lakh chuang senga sak tur Chite Convention Centre satu tura ruat Central PSU WAPCOS CMD RK Agarwal leh Senior Officials te nen  pawh Minister hi an inkawm a. WAPCOS CMD chuan Chite Convention Centre sak hna chu tender fel tawh niin contract chhangtute chhanna endik mek a nih thu leh February 2022 chhunga hna tan theih an beisei thu Minister hi an hrilh a ni.     

Pu Roberta chuan Union Secretary of Youth Affairs and Sports Sujata Chaturvedi pawh kawmin Union Sports Ministry-a Mizoram sports project tang mekte a sawipui a. Project engemaw zat tal kumina sanction tura a ngenna chu  Secretary hian a lo enzui tur thu a hrilh a ni.

Pu Robert Romawia chuan Ministry of Tribal Affairs Secretary pawh Archery Centre of Exellence din dan tur leh Zo Kutpui leh Mizoram State Games chungchangte a sawipui bawk.       

Minister hi Pu V.Lalengmawia MCS, Tourism Director, Pu Alex V.Chawngthu, Addl. RC leh Pu John Tanpuia, Secretary, Mizoram State Sports Council ten an tawiawm a ni.