1207/2024-2025

Siaha the 18th July 2024: Animal Husbandry & Veterinary Department, Siaha District leh National Livestock Mission (NLM) tangkawp chuan vawiin khan Farmers’ Training Hall, MADC, Siaha-ah ‘Awareness Campaign on African Swine Fever (ASF) cum Training of Farmers’ an buatsaih.

Vawiin hun kaihruaitu Dr H Lalzarliana, District AH & Vety Officer, Siaha chuan lawmthu sawina neiin vawk vulhtute tana hlauhawm em em, hri chi hrang hrang zinga vawk ten an thihpui hnem ber ASF chungchanga inhrilhhriatna leh a vulhtute tana training buatsaih chu a pawimawh hle a ti a, tun dinhmunah Siaha District chu a la him rih a an hriat thu tarlangin ‘a vulhtute mai bakah vantlang mipui kan fimkhur a ngai takzet’ a ti. Dr H Lalzarliana chuan ASF hri avangin Mizoram hmun hrang hrangah channa nasa tak a thleng nasa hle a ti a, Siaha mipuite chu tang rual a, hri lo lut tur venhim kawngah khawtlang leh mipui theihtawp chhuah theuh turin leh ram danga thawn chhuak thei tur khawpin a humhalh kawngah mitin fimkhur theuh turin a chah bawk.

ASF chungchang inzirtirna campaign-ah hian AH & Vety Department lam atanga mithiam ten ASF hri inkaichhawn theih dan te, Natna lanchhuah dan te, inven dan tur te leh hriat tur pawimawh dangte sawifiahna an nei a, Sawrkar mi pawimawhte bakah NGO aiawh te, VC aiawh te, Butchers Association aiawhte leh chanchinbumite an tel a, interaction session-te buatsaih niin zawhna leh chhanna nen hun hlawkthlak tak hman ho a ni.