1206/2024-2025

AIZAWL; the 18^th July, 2024: Vawiin  chawhma dar 10:00 khan Student Union (SU), Gov’t. T. Romana College (GTRC) chuan Vanapa Hall-ah Graduation Day-cum-Freshers’ Day  lawmna programme an huaihawt a. Pu C. Lalsawivunga, Hon’ble Minister, LAD, AH &Vety, District Council & Minorty Affairs etc. chuan khuallian niin hun a hman pui a, thusawina hun leh lawmman semna hun a hmang bawk.

Vawiin Graduation day-cum-Freshers’  Day lawmmna programme-ah hian  fuihna thuchah  sawiin,  khuallian Pu C. Lalsawivunga chuan  College atanga Pass leh Degree neih ringawt hi a tawk tawh lo, thiamna tak tak (skill) kan neih a hun tawh a ni. Keimahni tan, kan chhungkaw tan leh kan ram tana ti a, taimakna leh tumruhna nena kan beih a ngai a ni. Mizoram in Direct recruit IAS, IPS leh Central Service dang kan neih theih tawh loh te hi a vei awm tak zet a ni. Chuvangin kan College zirlai te hian  hlawhtlin kan duh tak tak chuan  Pathian tihna nen, taimakna, tumruhna leh tawhrimna nen mahni tan leh Mizoram tan kan beih a ngai tawh a ni.  Zu, ruihhlo  leh mipat hmeichhiatna hman khawlohna  kawng zawh loh turin Pathian tihna nen nun hmang u la, in nunchang te chuan in Nu leh Pa  te bakah Mizoram hi chawimawi zawk rawh se, a ti.

Dr. Jenifer Lalbiakdiki, Principal GTRC chuan  Pu C. Lalsawivunga, Minister  leh bialtu MLA ni bawk chuan vawi tam GTRC leh zirlai harsa zual tan vawi tam a luanchhuah tawh thu leh Civil Service Aspirants’ Corner leh Shed  te pawh a lo siam sak tawh thu tarlangin, Auditorium changtlung tak an neih theihna tur pawhin hma a lak mek thu a sawi bawk.

Vawiin programme-ah hian khuallian hian GTRC Magazine RALTIANG a tlangzarh a, Zirlai  titha (Meritorious students) 17 hnenah Incentives Cash Award a sem nghal bawk a ni. He cash Award hi zirtirtu leh mi inphal ten an donate a ni. Khuallian hian GTRC Library tan MLA Fund atangin ₹5 lakhs a pek tur thu a tarlang bawk.

Vawiin Graduation Day-cum-Freshers’ Day lawmna programme hi chawhma leh chawhnu Session-a thenin, chawhma session-ah hian  Meritorious students leh Graduate thar te chawimawina hun etc. hman a ni a. Chawhnu session-ah Motivational Speech, Special item hrang hrang bakah  Alumni, MZP, MSU leh outgoing students te atangin short Speech ngaihthlak a ni.