No.6662/2020-2021

AH & Vety Minister Dr K.Beichhua chuan vawiin khan AH &Vety Polyclinic-a programme buatsaihah Mizoram sawrkar flagship programme Socio-Economic Development Policy (SEDP) hnuaia AH&Vety department hmalakna bul tan nan pilot project 2019-2020 a hawng. Mizoram chhunga sa leh artui thar chhuah ti pung tura hmalakna tur niin sum cheng nuai 1895.28 dah a ni a, beneficiary chhungkaw 1020 thlanchhuah an ni.

Dr K Beichhua chuan Mizoram sawrkar flagship programme a hlawhtlin theih nan sawrkar chuan hma a la chho a,  board  leh department ten theihtawpa hma la chhoin Mizoram sawrkar AH&Vety hnuaia SEDP hmalakna tur chu COVID-19 hri leng karah hawn a ni thei ta chu lawmawm a ti a, he hun thleng thei tura mahni zawn theuha thahnemngai taka thawktute chungah lawmthu a sawi.  Pilot project atana beneficiary thlanchhuah chhungkaw 1020 te hnena tanpuina bultanna semchhuah tur hi sum sem satliah a ni lo tiin a dawngtute tur te thahnemngai tak leh rinawm taka thawk turin a fuih a, “A hmahruaitu in ni tih inhria ula, hlawhchham a remchang dawn lo”, a ti. He pilot project in a tum ber chu Zoramin saa a intodelh theih nan leh ram economy tihhmasawnnan a nih thu sawiin Minister chuan tihfuh loh leh felfai lo lai te a awm a nih chuan Zoram mipui te thurawn pe thin turin a chah bawk.

Minister Dr K.Beichhua chuan sawrkarin hri leng vanga harsatna a tawk chung pawhin theih tawp chhuahin tan an la, a ti a. An hmalakna hrang hrang a sawi zingah Vety Dispensary 7 District Hospital-a hlankai te, Rural Animal Health Centre 35 dispensary a hlankai te, District Veterinary Hospital 6 sak hna kalpui mek te, vawk pul hri a luh loh nana Animal Check-gate siam te, Mobile Veterinary Unit 8 lei te, Goat Breeding Farm leh Broiler Poultry Farm bakah Intensive mithun stud farm te a tel a ni.

Technical Report pe tu Dr Hmarkunga, AH&Vety Director tarlan danin beneficiary thlang turin District 8-ah DC te chairman-na hnuaiah District SEDP Beneficiary Selection Board siam a ni a. DVO te member secretary niin Fishery leh Sericulture a District Officer te chu Board member an ni. Department-in infrastructure duh ang a la neih remchan loh avangin district thar 3 te hi a hluiah beh tir lailawk an ni. Vawk vulh lamah - Piglet Multiplication Unit leh Piggery Fattening Unit kalpui tum a ni a, ar vulh lamah - Broiler farming leh Backyard Poultry (Rainbow Rooster) farming kalpui a ni ang. 

District hrang hrang atanga beneficiary awm zat leh scheme kalpui dan tur chu hetiang hi a ni:

SEDP fund hi beneficiary te bank account ah thun a ni ang a. Beneficiary te hnenah installment hnih zela pek zawh vek tum a ni. SEDP tanpuina sum pek chhuah hmain DVO hriatpuinain intiamkamna ziah tir vek an ni a, an trade thlan a zirin an hmalak dan tur leh tul dang hrilhfiahna training pek vek phawt tur a ni bawk. 

Programme hi AH& Vety Secretary Pi Lalzarmawii’n a kaihruai a. Veterinary, Fisheries leh Sericulture Development Board Vice-Chairman Pu C.Lalmuanpuia chuan lawmthu sawina hun a hmang a. MLA dang Dr ZR Thiamsanga, Pu Lalrinsanga Ralte, Pu Ramthanmawia, Pu H.Lalzirliana leh Pu Zothantluanga te bakah Board member-te leh official ten programme hi an chhim a ni.