2966/2024-2025

Aizawl, the 13th November, 2024: Vawiin khan AH & Vety. Minister Pu C.Lalsawivunga hovin Sawrkar flagship programme 'Hand Holding Scheme' hnuaia AH & Vety. Department kaltlanga pilot phase hmalaknate sawi ho a ni.

AH & Vety. Minister Pu C. Lalsawivunga chuan hand holding scheme tihlawhtling tura Vety. Department-in chak taka hma a la chu lawmawm a tih thu sawiin, thawktute chu a tul anga hma la chhunzawm zel turin a fuih a ni.

He hunah hian Dr. Robert Rualthankhuma, Nodal Officer, Hand Holding Scheme, AH & Vety. Department hnen atangin hamthatna dawngtu (Progress Partner) thlan kawnga Search Team-te zirchianna report a pe a. Hand holding scheme kalpui kawnga pawimawhte sawi ho a ni.

Pilot phase atana District AH & Vety. Officer te'n an thlan chhuahte chu November ni 5-8 chhung khan search team te'n hmun thumah inthenin Mizoram District hrang hranga hand holding scheme hnuaia tanpuina diltute chu an chenna inah an kalchilha, an farm dinhmunte an enpuiin an titipui zel a. AH & Vety. Department hnuaia hand holding scheme pilot phase atan hian diltu engemawzat zinga mi 67; Ar vulh 19, Kel vulh 8, Vawk vulh 30, Bawng vulh 6, Ran chaw siamna 2 bakah sa leh bawnghnute sawngbawlna lam siam diltu 2 te District hrang hrang atangin pilot project atan thlanchhuah an ni a, hemi atana loan senso ngai tur zat chu cheng nuai 1700 chuang a ni a. Pilot phase atana thlan chhuahte hi Planning & Programme Implementation Department-ah Apex Body-in an enfel leh tura thehluh a ni ang.

He meeting-ah hian AH & Vety. Department Special Secretary Pu Ajit Roy leh Director Dr. R. Zothanmawii bakah hand holding scheme buaipuitu Official-te an tel a ni.