Vawiin khan Khatla South MHIP te chuan MHIP Day champha vawi 40-na pualin Khatla South YMA Hall infuihthar leh na hun an hmang a. Pu C.Ngunlianchunga, Minister of State chu khuallian niin he huna lo tel ve, vengchhunga MHIP member kum 80 chin chunglam te hnenah chawimawina thuziak leh thilpek te hlan a ni.

Khatla South MHIP programme a thusawitu, Minister Pu C.Ngunlianchunga chuan Mizo hmeichhiate chu Mizo hnam hmelhmang an nih thu sawiin mizo te kan hmingthat leh hmingchhiat theihna kawngah mawphurhna pawimawh tak an neih thu a sawi a. Nungchang leh khawsak phungah in ulak tlat turin MHIP member te chu a chah a. Mizoram chhung leh pawna Mizo hmeichhiate thlen chin leh hmasawnna hrang hrang te tarlangin sumdawnna kawngah te leh ramhruaina kawngah te pawh nasa zawka tan la zel tur te leh chakzawk a ke rawn penchhuak turin MHIP member te chu a sawm a ni.