Pu Lal Thanzara, Health & Family Welfare Minister chuan vawiin khan Zemabawk Branch MHIP ten MHIP Day lawmna Zemabawk YMA Hall-a neih chu a hmanpui.

Pu Lal Thanzara chuan hmeichhia an nihna angin thil tamtak mipa tih theihloh an tih theih zawkna lam hi hre tharin heng atang hian hma la thar turin a fuih a. Minister chuan kum tamtak Mizoram rorelna sang berah aiawh an nei miah lo chungin ramchhung deng chhuak khawp hmalakna tha leh hlawhtling tak tak hmeichhiaten an nei thei tho a, tunah phei chuan aiawh an neih tawh avangin hmeichhia anga hmalakna pawh kawng hrang hrangah a tihchak sawt a beisei thu a sawi. Nu mawhphurhna hmasa ber chu pasalte leh fate hmangaiha, ngaihvena, a taka an tan hun pek leh an bula hun hman tam hi a ni tiin hei hian khawtlang nun nasa takin a nghawng a ni a ti. Minister chuan MHIP- te hian YMA ang bawkin ruihhlo do kawngah hma nasa taka an lo lak tawh chu fakawm a tiin hei pawh hi chhawm nung zel turin a ngen a ni.

Inkhawm hi Pi Vanlalauvi, President-in a kaihruai a, Zemabawk Branch MHIP-ah hian member 2606 awmin Vohbik (pianphunga rualban lo) 41 an awm a, vawiin inkhawmah hian Vohbikte hnenah hian Pu Lal Thanzara chuan thilpek a hlan a ni.