882/2024-2025

Aizawl, 20.06.2024: Mizoram Milk Producers’ Co-operative Union Ltd. (MULCO) chuan vawiin chawhma khan MULCO Conference Hall-ah Annual General Meeting vawi 28-na an hmang a. He hun hi AH & Vety Minister Pu C. Lalsawivunga chuan k huallian niin hun a hman pui.

Minister Pu C. Lalsawivunga chuan kum 1984 a MULCO din a nih atanga vawiin ni thleng a hma a sawn zel na kawng a nasa taka thawktu, Board of Directors te leh a thawktute zawng zawng bakah Society a kuthnathawktute zawng zawng chungah lawmthu a sawi a; MULCO kaltlang a mi tam takin eizawnna an neih phah thu leh Mizoram economy chawisanna kawngah a thawh hlawk zia sawiin, Mizoram state a society hlawhtling ber zing ami a nih thu a sawi a ni. Minister chuan hmasawnna tur tam tak a la awm thu sawiin, bawng vulhtuten an bawng vulhte an tiral nasa in, a hmun ngei ah kuthnathawktute dinhmun a zirchhianna atangin an harsatna ber pakhat chu ranchhaw chungchangah a nih thu leh pawi a tih thu sawiin, he harsatna sukiang tur hian Department lam hotute nen theihtawp an chhuah mek thu a sawi a ni.

Vety Minister chuan Society member te leh MULCO a thawktute chu tan la zel tura fuihin, Mizo mipui hnenah hriselna atan a bawnghnute pawimawh zia zirtirna pek kawng ah te pawh tan la zel turin a fuih a. MULCO in a bawnghnute atanga eitur a siam chhuah hrang hrangte hi mimal leh chhungkua dinhmun chawisan nan a pawimawh bakah Mizoram economy chawisanna atan leh Outsource Revenue atan tangkai taka hman a pawimawh zia hemi kawngah hian bawnghnute tharchhuah tam zel a ngai a, bawng vulh pawh tih pun zel a tul dawn avangin kut hnathawktute leh Sawrkar chu an thawkho zel dawn tih sawiin, kut hnathawktute dawmkan chu Sawrkar tum bulpui ber a nih zia sawiin, AH & Vety Department pawhin hma a lak zel thu a sawi a ruahmanna thar pawh kalpui mek zel a nih thu a sawi a ni.

Minister chuan Department hmalak mekna chungchang sawi chhunzawmin tun dinhmunah pawh AH & Vety Department in Thenzawl a Fodder a chin mek chu tipung tura hmalak mek niin kum thar ah chuan rawnchaw hi a let a a pun theih a beisei thu a sawi a. Sawrkar in Handholding Policy a kalpui mek atangin leh Union Ministry hmalakna atangin intodelh thei tura hmalak mek zel a nih thu a sawi a ni. Tun dinhmunah Mizoram chu thil hrang hrang ah ala intodelh tawkloh zia sawiin kan intodelh theih nan Mizoram sawkar chu kulhnathawktute lamah a tang tlat reng dawn a ni tiin, ranchaw lama harsatna pawh ruahmanna a siam mek zel a ni tih a sawi a ni.

MULCO a thawktute leh Society member kuthnathawktute chu rinawm tak leh dik taka hnathawk a, taima taka thawk zel turin a fuih bawk a ni.

He Annual General Meeting hi Pu C. Lalrammawia, Chairman, MULCO chuan a kaihruai a, Pu Harsh Vardhan, Managing Director chuan kum 2023-2024 chhung a MULCO dinhmun tlangpui report pe a. Tun kum kalta chhungin MULCO in kawng hrang hrangin hma a sawn ve zel a, kum 2023-2024 chhung a MULCO in kuthnathawktute hnen atangin bawnghnute litres nuai 9 chuang a leisak a, bawnghnute lei nan hian Rs. 42,897,656.00 a hmang a; MULCO hian heng bawnghnute a lakkhawm te hi lo sawngbawl a ti thianghlim in mipui hnenah lei theih turin a chhawpchhuak a, bawnghnute leh bawnghnute atanga siamchhuah hralhna atanga a sum hmuh zat chu Rs. 1048,58,249.00 a ni. MULCO hian kum 2023-2024 chhung a Business Turnover chu Rs 1093.45 Lakhs niin, Gross Profit hi Rs. 207.19 Lakhs a nei ani.  MULCO hian Society leh farmers ten ranchhaw tha (mineral mixture) bakah rawnchhaw tha zawk leh man tlawm zawk a an neih theih nan hma nasa takin ala a, National Dairy Development Board (NDDB) te nen tangkawpin Fodder Scheme te kalpuiin, phai atangin mithiam te rawn kalin hmalak dan tur te zirho a enho thin a ni. Tunah hian MULCO hian ah hian thawktu mi 55 an awm a, tin, MULCO bawnghnute leh products te hi Sales Booth - 319 an nei mek kaltlangin mipui hnenah an hralhchhuak mek a ni.

28^th MULCO Annual General Meeting hawnna inkhawm hi Pu H.Lalnghinglova, Member, Board of Director chuan lawmthu sawiin a khar a. Chawhnu lamah rorel a chhunzawm a ni.