883/2024-2025

Aizawl dated 20th June, 2024: Vawiin chawhnu khan Mizoram sawrkar leh Mizoram University buatsaihin I-Shuo University, Taiwan leh Taiwan Experience Education Program kaltlangin Taiwan atanga mithiam lo kal te, MZU, International Affairs-a thawktute, leh Mizoram sawrkar hnuai a Rural Development Department, Planning & Programme Implementation Department, Horticulture Department leh Higher & Technical Education Department-a hotuten ram pahnih inkar a  thawhhona tha zawk siamna tur ‘ Dialogue on International Collaborations’ chu Conference Hall, Royale Lalawi Hotel, Khatlaah an nei a. He hun ah hian Pu K.Sapdanga, Home Minister chu khuallian a ni a, Prof. Lalnilawma, Minister of State for Rural Development chuan a telpui a ni.

Khuallian Pu K.Sapdanga, Home Minister chuan Taiwan leh Mizoram sawrkarin inlaichinna tha a neih theih nana thiamna leh theihna inzirtawnna tur a ‘Dialogue on International Collaborations’ buatsaih a ni chu lawmawm a tih thu a sawi a. Mizo thalai thiamna leh theihna tihpunna kawng ah thil tangkai tak a nih ngei a beisei thu a sawi. I-Shuo University leh Mizoram University chuan thawhhona tur thuthlung an siam chuan ram pahnih tan hmasawnna hmel thar a thlen ngei a beisei thu sawiin thalaite tan eizawnna ngelnghet neihna tur a rahbi thar thlentu a nih ngei a rin thu a sawi a. Vawiin inkawmhona chuan Taiwan ram chu Science leh Technology lam a thiamna sang tak nei an nih angin heng thiamna te hi Mizoram Police Department enkawl Cyber Security lam a hmasawnna thlentu a nih ngei a beisei thu Home Minister chuan a sawi bawk a ni.

Minister of State Prof. Lalnilawma chuan kalkhawmte lawmna thu sawiin vawiin inkawmhona chu National Education Policy 2020-in a tum zing a pakhat, ‘Internationalization’ tih puitlinna kawnga sulsutu pawimawh tak a nih thu a sawi a. He inkawmhona hian ram pahnih inlaichinna tinghettu a nih bak ah thalaite tan thiamthil eizawnnatlak leh tangkai inzirtawnna kawngah hmasawnna nasa tak thlentu a nih ngei a beisei thu a sawi.

He inkawmhona ah hian ISU & TEEP atangin Dr. Guu Yuankung, President, I-Shou University, Taiwan, Peter Chen, Director, Taipei, Economic and Cultural Centre, India leh Dr. Huang Wenshen, Deputy Dean, International Affairs, I-Shou University, Taiwan-te an tel a. Prof. HK Laldinpuii Fente, Director, International Affairs, MZU chuan inhmelhriattirna hun hmangin Prof. Lalnundanga, Registrar, MZU chuan lawmthu sawina hun a hmang bawk a ni.

‘Dialogue on International Collaborations’ kaltlang a inkawmhona hun ah hian Dr. Guu Yuankung, President, I-Shou University, Taiwan chuan mipui dawrtute avanga sumdawnna lian tak takten hawhtlinna an chan hian an hlawhtlinna chhan mipuite tanpui let ve nan khawtlang tihhmasawn hna kalpui an ngaih pawimawh hmasak thin thu a sawi a. Prof. Dibakar Chandra Deka, Vice Chancellor, Mizoram University chuan Mizoram chu state thang chak tak a nih avangin State nuam tak a nih zel theih nan hmasawnna ruangam hrang hrang kalpui tur chuan, Town Planning felfai leh awmze nei ngaihtuah tel zel a pawimawh thu a sawi. Zirlai leh zirtirtu intlawhtawnna nasa zawk neih dan tur te, eizawnna rintlak leh ngelnghet nei tur a thiamna hrang hrang intawm dan tur te, tawng inzirtawnna buatsaih dan tur te he inkawmhonaah hian sawi ho a ni a. Taiwan ram thiamna hmanga thlai thartute tihhmasawn dan tur leh tui hnianghnar zawk mipuiin an neih theihna tur a thawhhona awm thei te sawi ho a ni bawk.