Nimin, July 15 khan AH & Vety Minister Pu C. Ngunlianchunga chuan Department hmalakna leh hmachhawp te en in Ramrikawn leh Tanhril a tlawha, AH & Vety Director Dr LB Sailo leh Department Officer ten an tawiawm a ni.

Minister chuan ar note leh artui a intodelh nan Tanhrilah RIDF (NABARD) hnuaia din mek Joint Venture Project a tlawh a, Hatchery Unit, Brooding Unit leh layer house te sak zawh tawh niin INBRO, Hyderabad nena thawh hona siam chu a enpui.

He project hi Infrastructure development RIDF (NABARD) atanga hmuh niin INBRO Hyderabad-te thiamna (technology) hman a ni a. A enkawl hna hi Zoram Poultry Development Society ten an tum ang a, project tan a nih hunah chuan sorkarin sum sen belh lovin a enkawlna senso zawng zawng hi Zoram Poultry Development Society in a tum ang a, 50% hlawkna an chang dawn a ni. Hei bakah hian hnathawkte hlawh leh tul dang zawng zawng hi ZPD society in a hlep atangin a pe dawn a, he ar farm hian ar note indaih lohna 30% in a phuhru ang.

Minister Pu Ngunlianchunga hian Ramrikawna Animal Feed Plant a tlawh nghal a, he feed mill tih lenna tur hian RIDF atangin tanpuina awm thei ang ang dap chhuah a ni a. Hun reilote ah chuan ran vulh tuten ran chaw an mamawh ang tlawm zawkin department-in siam chhuah a tum a ni. Minister chuan Department-in ranvulhtute tan awlsam leh man man zawk a ranchaw siam chhuah leh hralh a tum thu te, a remchan dan anga ranvulhtute hnena ran chaw subsidy pek tum a nih dan te a sawi a. He hna hi kumin chhung ngeia tan hman anih theih nan hmalak tum a ni.