Sericulture Department-in RKVY sum Rs 36.96 lakhs hmanga Directorate Office Building thlanga an sak thar, Aizawl District Sericulture Office atana hman tur chu vawiin chawhnu dar 2:00 khan Minister of State Dr B.D.Chakma i/c Sericulture etc. chuan a hawng.

Hawnna thu sawiin Minister chuan Chief Minister hmalakna avanga Sericulture Department-in building thar tha tak an neih theih avangin lawmthu a sawi a. Sericulture chu mi rethei tana eizawnna tha tak a nih thu sawiin Zoram mipui te chhawr tangkai lehzual theih nan theihtawp chhuaha lungruala taka hna thawk chhunzawm zel turin Department Officer leh Staff kalkhawm te chu a chah. Mipui dawr department an nih hriaa, beneficiary farmer rawn pan thin tu te tan pawh biak nuam tak leh dawr nuam tak ni tura hawihhawm taka thawk thin turin a fuih bawk. Mizoram ah sorkar thil kan en hrang thin chu tha lo tiin neitu rilru pu chunga mahni ta anga sorkar office leh bungrua/hmanrua te ena uluk taka enkawl thiam turin a fuih bawk. Sericulture farm a tam thei ang ber tlawh a tum thu sawiin Minister chuan officer leh staff te pawh field visit nei tam turin a chah a, chuta tang chuan ruahmanna tha zawk a siam theih dawn a ni, a ti. Sericulture Department chu sum thawk chhuak thei department a nih anga sorkar sum tam zawk thawk chhuak tura theihtawp chhuah zel turin a chah bawk a ni.

Sericulture Secretary Pi C.Zothankhumi kaihhruai inkhawm ah hian Director Pu D.Engzananga chuan technical report pe-in District Sericulture Office building thar chu RKVY sum Rs 61.96 lakhs an dawn atanga Rs 36.96 lakhs senga sak a nih thu a tarlang a, building tana an sen ral bak la bang sum chu cocoon leina leh emporium siam nana hman a nih dan te a sawifiah bawk.