3582/2024-2025

Saitual, the 17th December, 2024: Vawiin chawhnu dar 1:30 pm khan Animal Husbandry & Veterinary Department Minister Pu C. Lalsawivunga chuan Saitual District Veterinary Hospital chu a hawng a, a hawnna inkhawm hi District A.H & Vety Complex, Saitualah neih a ni.

He hunah hian Minister Pu C. Lalsawivunga chuan thu sawiin, Sawrkar hmasain bul a lo ṭan tawh Saitual District Veterinary Hospital bakah Laboratory building leh Veterinary Officer quarter hawn a ni chu lawmawm a tih thu a sawi a, a hawnna inkhawma kalkhawmte chungah lawmthu a sawi nghal a ni. Minister chuan Mizote chu ran vulh mi an ni tih sawiin AH & Vety department chu Mizote tan department pawimawh leh tangkai tak a ni, a ti.

Pu C. Lalsawivunga chuan Mizoram chu ran chaw, artui leh sa thianghlim lamah kan intodelh lo hle tih sawiin, District Veterinary Hospital chu hemi kawnga hmasawnna rawn thlen thei tur atana pawimawh tak a ni dawn a ni, a ti. Minister chuan African Swine Fever vangin ran vulh tuten harsatna nasa tak an tawk tih a sawi a, chutih rualin beidawng loin theihtawp an chhuah chhunzawm zel a ni, a ti.

Minister chuan sawrkar hnathawkte chu sawrkar innghahna an nih angin ngaihtuahna thar nen taima leh rinawm taka hnathawk turin a chah a, AH & Vety hospital pawh Saitual mipuite tan chhenfakawm a lo nih ngei theih nan hnathawktute pawh tha taka thawk turin a fuih nghal a ni.

He District Veterinary Hospital hawnna inkhawmah hian Capt. Lalhmasanga CO, Keifang Corps chuan hunserh a hmang a. Pu Ajit Roy, IAS Spl. Secretary, AH & Vety Deptt. chuan inlawmna thu sawiin, technical report hi Dr. F.Lalramhluna, Addl. Director (VS&PH) atanga ngaihthlak a ni. Pu C.Lalsawivunga, Hon'ble Minister, AH & Vety Department, Saitual Bawrhsap Dr. Lalngura Tlau leh Pu H. Laltlanzova, Chairman Town Joint V.C chuan thu an sawi a, Dr. H. Vanlalhmangaihzuala, District AH & Veterinary Officer, Saitual chuan lawmthu sawiin hun a khar a ni. He hunah hian AH & Vety department atanga thuneitute, sawrkar department hrang hranga hotute, kohhran leh khawtlang hruaitute leh tlawmngai pawlte an tel a ni.